tumhaare shahr mein pahuncha tha KHasta-jaan ban ke

tumhāre shahr meñ pahuñchā thā ḳhasta-jāñ ban ke

magar na aaya koī pesh meherbāñ ban ke

na jaane kaun se be-barg peḌ kā saaya

hamāre sar pe musallat hai āsmāñ ban ke

maiñ ghirne vaalā thā kāñToñ ke darmiyāñ lekin

guloñ ne thaam liyā mujh ko kārvāñ ban ke

kahāñ chhupā.eñge mujh ko ye nāqidān-e-adab

maiñ phail jā.ūñgā ghar ghar meñ dāstāñ ban ke

bakeñge shauq se bāzār-e-jins meñ yaaro

saje hue haiñ kitāboñ kī jo dukāñ ban ke

unhīñ se pūchhiye ab rāz-hā-e-kaun-o-makāñ

jo uḌ rahe haiñ sū-e-asmāñ dhuāñ ban ke

'kamāl' ranj-o-alam be-shumār haiñ lekin

maiñ jī rahā huuñ zamāne meñ kāmrāñ ban ke

tumhaare shahr mein pahuncha tha KHasta-jaan ban ke

magar na aaya koi pesh meherban ban ke

na jaane kaun se be-barg peD ka saya

hamare sar pe musallat hai aasman ban ke

main ghirne wala tha kanTon ke darmiyan lekin

gulon ne tham liya mujh ko karwan ban ke

kahan chhupaenge mujh ko ye naqidan-e-adab

main phail jaunga ghar ghar mein dastan ban ke

bakenge shauq se bazar-e-jins mein yaro

saje hue hain kitabon ki jo dukan ban ke

unhin se puchhiye ab raaz-ha-e-kaun-o-makan

jo uD rahe hain su-e-asman dhuan ban ke

'kamal' ranj-o-alam be-shumar hain lekin

main ji raha hun zamane mein kaamran ban ke