tumhaari farzangi se kuchh kam nahin hai diwana-pan hamara

tumhārī farzāngī se kuchh kam nahīñ hai dīvāna-pan hamārā

tumheñ mubārak tumhārī hijrat hameñ mubārak vatan hamārā

jo gulsitānoñ kī shāh-rāhoñ pe apne bistar lagā na paa.e

vahī vahāñ jā ke kah rahe haiñ nahīñ hai koī chaman hamārā

Ba-qaul-e-'iqbāl' pahle pahle yahāñ lagā.e the jis ne Dere

vo kārvāñ aaj bhī basā hai kanār-e-gañg-o-jaman hamārā

ba.īd-e-aḳhlāq-o-ādamiyyat hai rahnumāoñ se bad-gumānī

kamāl-e-sāda-dilī to ye hai ki saath de rāhzan hamārā

sadā-e-nāqūs-e-but-kada par giraft kā mashvara na diije

ibādat-o-bandagī ke maan.e nahīñ hai jab barhaman hamārā

ye dūsrī baat hai ki hijrat na kar ke dar-dar kī ḳhaak chhānī

chane na bechegā 'josh' kī tarah zauq-e-sher-o-suḳhan hamārā

vatan kī is sar-zamīñ ko ai 'shād' kaun se dil se chhoḌ deñ ham

vatan kī jis sar-zamīñ pe guzrā hai daur-e-dār-o-rasan hamārā

tumhaari farzangi se kuchh kam nahin hai diwana-pan hamara

tumhein mubarak tumhaari hijrat hamein mubarak watan hamara

jo gulsitanon ki shah-rahon pe apne bistar laga na pae

wahi wahan ja ke kah rahe hain nahin hai koi chaman hamara

Ba-qaul-e-'iqbaal' pahle pahle yahan lagae the jis ne Dere

wo karwan aaj bhi basa hai kanar-e-gang-o-jaman hamara

baid-e-aKHlaq-o-adamiyyat hai rahnumaon se bad-gumani

kamal-e-sada-dili to ye hai ki sath de rahzan hamara

sada-e-naqus-e-but-kada par giraft ka mashwara na dije

ibaadat-o-bandagi ke mane nahin hai jab barhaman hamara

ye dusri baat hai ki hijrat na kar ke dar-dar ki KHak chhani

chane na bechega 'josh' ki tarah zauq-e-sher-o-suKHan hamara

watan ki is sar-zamin ko ai 'shad' kaun se dil se chhoD den hum

watan ki jis sar-zamin pe guzra hai daur-e-dar-o-rasan hamara