tumhaari lan-tarani ke karishme dekhe-bhaale hain

tumhārī lan-tarānī ke karishme dekhe-bhāle haiñ

chalo ab sāmne aa jaao ham bhī aañkh vaale haiñ

na kyūñkar rashk-e-dushman se ḳhalish ho ḳhār-e-hasrat kī

ye vo kāñTā hai jis se paañv meñ kyā dil meñ chhāle haiñ

ye sadma jiite jī dil se hamāre jā nahīñ saktā

unheñ vo bhūle baiThe haiñ jo un par marne vaale haiñ

hamārī zindagī se tañg hotā hai abas koī

ġham-e-ulfat salāmat hai to kai din jiine vaale haiñ

'amīr' o 'dāġh' tak ye imtiyāz o farq thā 'ahsan'

kahāñ ab lucknow vaale kahāñ ab dillī vaale haiñ

tumhaari lan-tarani ke karishme dekhe-bhaale hain

chalo ab samne aa jao hum bhi aankh wale hain

na kyunkar rashk-e-dushman se KHalish ho KHar-e-hasrat ki

ye wo kanTa hai jis se panw mein kya dil mein chhaale hain

ye sadma jite ji dil se hamare ja nahin sakta

unhen wo bhule baiThe hain jo un par marne wale hain

hamari zindagi se tang hota hai abas koi

gham-e-ulfat salamat hai to kai din jine wale hain

'amir' o 'dagh' tak ye imtiyaz o farq tha 'ahsan'

kahan ab lucknow wale kahan ab dilli wale hain