tumhaari yaad mein jite tumhaara dam bharte

tumhārī yaad meñ jiite tumhārā dam bharte

ye kyā ki umr gañvā dī hai naukrī karte

na jā raqīb kī mahfil meñ raat ko tanhā

ye dekh paañv pe ham tere haath haiñ rakhte

kuchh is liye bhī use dukh meñ mirī yaad aa.ī

charāġh shaam se pahle jalā nahīñ karte

pata lagāo ḳhazāna kahāñ hai dafn ki maiñ

qil.e meñ pahuñch to jā.ūñgā mārte marte

vo kyā laḌeñge hamāre huqūq kī ḳhātir

jo log kāsa-e-darvesh tak nahīñ bharte

hamārī aañkh se aañsū bhī gir rahe hoñge

ki jin dinoñ meñ daraḳhtoñ se paat haiñ jhaḌte

agar tū ham se nigāheñ na phertā hamdam

to ham bhī ishq kisī se na dūsrā karte

bahisht chhoḌ ke duniyā ko fauqiyat degā

ravāna honā hai jis ne charāġh ke bujhte

tumhaari yaad mein jite tumhaara dam bharte

ye kya ki umr ganwa di hai naukri karte

na ja raqib ki mahfil mein raat ko tanha

ye dekh panw pe hum tere hath hain rakhte

kuchh is liye bhi use dukh mein meri yaad aai

charagh sham se pahle jala nahin karte

pata lagao KHazana kahan hai dafn ki main

qile mein pahunch to jaunga marte marte

wo kya laDenge hamare huquq ki KHatir

jo log kasa-e-darwesh tak nahin bharte

hamari aankh se aansu bhi gir rahe honge

ki jin dinon mein daraKHton se pat hain jhaDte

agar tu hum se nigahen na pherta hamdam

to hum bhi ishq kisi se na dusra karte

bahisht chhoD ke duniya ko fauqiyat dega

rawana hona hai jis ne charagh ke bujhte