tumhein han kisi se mohabbat kahan hai

tumheñ haañ kisī se mohabbat kahāñ hai

zarā dekhiye to vo sūrat kahāñ hai

bhalā ab kisī se suno baat kyā tum

tumheñ apnī bātoñ se fursat kahāñ hai

har ik baat par ro.e se dete ho ab

vo shoḳhī kahāñ vo sharārat kahāñ hai

paḌe rahte ho pahroñ hī muñh lapeTe

vo jalsa kahāñ hai vo sohbat kahāñ hai

koī kuchh kahe ab tumheñ kuchh na bolo

vo tezī kahāñ vo zarāfat kahāñ hai

vo lag chalnā har ik se aafat tumhārā

vo tundī vo shoḳhī vo farhat kahāñ hai

koī jāntā bhī nahīñ ab to tum ko

vo pahlī sī ḳhushbū meñ shohrat kahāñ hai

tumhīñ dekho aur ġhair kī bāteñ sunñā

vo shaan ab kahāñ hai vo shaukat kahāñ hai

tumheñ ho adū hī kā milnā mubārak

adū kī sī ham meñ liyāqat kahāñ hai

'nizām' aap hī aap aa.egā yaañ par

yahāñ rashk sahne kī tāqat kahāñ hai

tumhein han kisi se mohabbat kahan hai

zara dekhiye to wo surat kahan hai

bhala ab kisi se suno baat kya tum

tumhein apni baaton se fursat kahan hai

har ek baat par roe se dete ho ab

wo shoKHi kahan wo shararat kahan hai

paDe rahte ho pahron hi munh lapeTe

wo jalsa kahan hai wo sohbat kahan hai

koi kuchh kahe ab tumhein kuchh na bolo

wo tezi kahan wo zarafat kahan hai

wo lag chalna har ek se aafat tumhaara

wo tundi wo shoKHi wo farhat kahan hai

koi jaanta bhi nahin ab to tum ko

wo pahli si KHushbu mein shohrat kahan hai

tumhin dekho aur ghair ki baaten sunna

wo shan ab kahan hai wo shaukat kahan hai

tumhein ho adu hi ka milna mubarak

adu ki si hum mein liyaqat kahan hai

'nizam' aap hi aap aaega yan par

yahan rashk sahne ki taqat kahan hai