tumhein shab-e-wada dard-e-sar tha ye sab hain be-etibar baaten

tumheñ shab-e-va.ada dard-e-sar thā ye sab haiñ be-e'tibār bāteñ

yaqīñ na aa.egā ham ko hargiz banāo go tum hazār bāteñ

nahīñ jo manzūr tum ko milnā to kyuuñ nahīñ saaf saaf kahte

samajh meñ aatī nahīñ hamāre karo na tum pechdār bāteñ

uThī hai kaalī ghaTā falak par hai sāqī-e-māh-vash baġhal meñ

bahak bahak kar haiñ kyā maze se banā rahe bāda-ḳhvār bāteñ

huiiñ haiñ jis din se chaar āñkheñ tumhārī ai yaar 'mashriqī' se

yahī tamannā hai baiTh kar tum suno hamārī do-chār bāteñ

hai aa.ī mushkil se vasl kī shab ki jis kī muddat se thī tamannā

jo maiñ ne shikve kiye the us kī karo na tum baar baar bāteñ

ye kyā mahal hai ki aaj karte ho shaiḳh jī zikr-e-zohd-o-taqvā

yahī hai vājib ki hoñ gul-o-mul kī vaqt-e-fasl-e-bahār bāteñ

jo aaj aa.e ho mere ghar par to hai ye zikr-e-raqīb kaisā

na kījiye 'mashriqī' se sāhab ki haiñ ye sab nāgavār bāteñ

tumhein shab-e-wada dard-e-sar tha ye sab hain be-e'tibar baaten

yaqin na aaega hum ko hargiz banao go tum hazar baaten

nahin jo manzur tum ko milna to kyun nahin saf saf kahte

samajh mein aati nahin hamare karo na tum pechdar baaten

uThi hai kali ghaTa falak par hai saqi-e-mah-wash baghal mein

bahak bahak kar hain kya maze se bana rahe baada-KHwar baaten

huin hain jis din se chaar aankhen tumhaari ai yar 'mashriqi' se

yahi tamanna hai baiTh kar tum suno hamari do-chaar baaten

hai aai mushkil se wasl ki shab ki jis ki muddat se thi tamanna

jo main ne shikwe kiye the us ki karo na tum bar bar baaten

ye kya mahal hai ki aaj karte ho shaiKH ji zikr-e-zohd-o-taqwa

yahi hai wajib ki hon gul-o-mul ki waqt-e-fasl-e-bahaar baaten

jo aaj aae ho mere ghar par to hai ye zikr-e-raqib kaisa

na kijiye 'mashriqi' se sahab ki hain ye sab nagawar baaten