tumhin pher loge jo humse nigahen

tumhīñ pher loge jo ham se nigāheñ

mileñgī kahāñ ġham-zadoñ ko panāheñ

bashar nāptā hai sitāroñ kī rāheñ

use le na Dūbeñ ye parvāz-gāheñ

talātum se kab Dūbte haiñ safīne

agar Dūbte dil Dubonā na chāheñ

Thahartī haiñ gul par na shams-o-qamar par

na jaane kise DhūñDhtī haiñ nigāheñ

unheñ mil gayā naam dair-o-haram kā

jo insāniyat kī haiñ qurbān-gāheñ

nahīñ koī ummīd ham ko vafā kī

jafā hī sahī aap kuchh to nibāheñ

junūñ hī yahāñ kaam aa.e to aa.e

bahut pur-ḳhatar haiñ mohabbat kī rāheñ

mirī kā.enāt-e-mohabbat hai 'sābir'

yahī chand aañsū yahī chand aaheñ

tumhin pher loge jo hum se nigahen

milengi kahan gham-zadon ko panahen

bashar napta hai sitaron ki rahen

use le na Duben ye parwaz-gahen

talatum se kab Dubte hain safine

agar Dubte dil Dubona na chahen

Thaharti hain gul par na shams-o-qamar par

na jaane kise DhunDhti hain nigahen

unhen mil gaya nam dair-o-haram ka

jo insaniyat ki hain qurban-gahen

nahin koi ummid hum ko wafa ki

jafa hi sahi aap kuchh to nibahen

junun hi yahan kaam aae to aae

bahut pur-KHatar hain mohabbat ki rahen

meri kaenat-e-mohabbat hai 'sabir'

yahi chand aansu yahi chand aahen