tu hi bata de jamal-e-mani tera karen intizar kab tak

tū hī batā de jamāl-e-ma.anī tirā kareñ intizār kab tak

hayāt kā e'tibār ho bhī nigāh kā e'tibār kab tak

jahān-e-zulm-o-jafā ke mālik koī na ho ashk-bār kab tak

jo dil hī majbūr ho chukā ho to aañkh par iḳhtiyār kab tak

mileñge dāman se aa ke āḳhir mire garebāñ ke taar kab tak

koī batā.e ki ho sakegā mirā junūñ puḳhta-kār kab tak

jo kī kisī ne bhī purshish-e-ġham to chashm-e-majbūr ho ga.ī nam

magar dil-e-zabt-āzmā ke bayān meñ iḳhtisār kab tak

vo bād-e-sar-sar kī be-qarārī vo bijliyāñ aur vo sho.ala-bārī

bas ab qafas hī meñ mutma.in huuñ nazar ko shauq-e-bahār kab tak

ḳhizāñ ke be-kaif daur kā bhī mire garebāñ ye kuchh to haq hai

junūñ ko āḳhir banā.e rakkhūñ niyāz-mand-e-bahār kab tak

qadam qadam par sanam-kada hai nazar nazar meñ haram kā manzar

tajalliyāñ hī to haiñ ye āḳhir ba-qaid-e-dīdār-e-yār kab tak

tu hi bata de jamal-e-mani tera karen intizar kab tak

hayat ka e'tibar ho bhi nigah ka e'tibar kab tak

jahan-e-zulm-o-jafa ke malik koi na ho ashk-bar kab tak

jo dil hi majbur ho chuka ho to aankh par iKHtiyar kab tak

milenge daman se aa ke aaKHir mere gareban ke tar kab tak

koi batae ki ho sakega mera junun puKHta-kar kab tak

jo ki kisi ne bhi purshish-e-gham to chashm-e-majbur ho gai nam

magar dil-e-zabt-azma ke bayan mein iKHtisar kab tak

wo baad-e-sar-sar ki be-qarari wo bijliyan aur wo shoala-bari

bas ab qafas hi mein mutmain hun nazar ko shauq-e-bahaar kab tak

KHizan ke be-kaif daur ka bhi mere gareban ye kuchh to haq hai

junun ko aaKHir banae rakkhun niyaz-mand-e-bahaar kab tak

qadam qadam par sanam-kada hai nazar nazar mein haram ka manzar

tajalliyan hi to hain ye aaKHir ba-qaid-e-didar-e-yar kab tak