tu ne jab bhi aankh milai

tū ne jab bhī aañkh milā.ī

dīda-o-dil par aafat aa.ī

ye sannāTā ye tanhā.ī

lekin terī yaad to aa.ī

dair-o-haram meñ jā baiThe haiñ

duniyā jin ko raas na aa.ī

TuuT ga.iiñ saarī zanjīreñ

zulf tire ruḳh par lahrā.ī

manzil duur thī lekin ham ne

ek qadam meñ Thokar khaa.ī

tujh ko mubārak phuul aur kaliyāñ

merā hissa ābla-pā.ī

chhānī ham ne nagrī nagrī

sahrā sahrā ḳhaak uḌaa.ī

kaun 'majīd' is bhed ko jaane

kyā shai khoī kyā shai paa.ī

tu ne jab bhi aankh milai

dida-o-dil par aafat aai

ye sannaTa ye tanhai

lekin teri yaad to aai

dair-o-haram mein ja baiThe hain

duniya jin ko ras na aai

TuT gain sari zanjiren

zulf tere ruKH par lahrai

manzil dur thi lekin hum ne

ek qadam mein Thokar khai

tujh ko mubarak phul aur kaliyan

mera hissa aabla-pai

chhani hum ne nagri nagri

sahra sahra KHak uDai

kaun 'majid' is bhed ko jaane

kya shai khoi kya shai pai