tu wo hindostan mein lala hai

tū vo hindostāñ meñ laalā hai

jis kā dāġhī ġhulām laalā hai

haath vahshat se rok ai majnūñ

paañv paḌtā har ek chhālā hai

be-mai-o-nāñ huuñ maiñ vo ġhairoñ se

ham-piyāla hai ham-nivāla hai

dil-e-har-shaiḳh-o-barhaman hai judā

kahīñ masjid kahīñ shivālā hai

us ke aane se tan meñ jaan aa.ī

dam-e-āḳhir liyā sambhālā hai

chup rahūñ kyā maiñ sūrat-e-nāqūs

dil hai shaq jab laboñ pe naala hai

kyuuñ na simran paḌhe bashar ai 'shād'

aadmī haDDiyoñ kā maalā hai

tu wo hindostan mein lala hai

jis ka daghi ghulam lala hai

hath wahshat se rok ai majnun

panw paDta har ek chhaala hai

be-mai-o-nan hun main wo ghairon se

ham-piyala hai ham-niwala hai

dil-e-har-shaiKH-o-barhaman hai juda

kahin masjid kahin shiwala hai

us ke aane se tan mein jaan aai

dam-e-aKHir liya sambhaala hai

chup rahun kya main surat-e-naqus

dil hai shaq jab labon pe nala hai

kyun na simran paDhe bashar ai 'shad'

aadmi haDDiyon ka mala hai