TuTa hua aaina jo raste mein paDa tha

TuuTā huā ā.īna jo raste meñ paḌā thā

sūraj kī tarah merī nigāhoñ meñ chubhā thā

naam apnā hī maiñ sab se khaḌā pūchh rahā thā

kuchh merī samajh meñ nahīñ aayā ki ye kyā thā

āñkhoñ ke darīche nazar aate the muqaffal

aur zehn ke kamre meñ dhuāñ phail rahā thā

jaatī huī bārāt ne ik lamha ThiThak kar

Thahrī huī ik laash pe mātam bhī kiyā thā

maazī nahīñ martā hai yaqīñ aa gayā mujh ko

biitā huā har pal vo liye saath khaḌā thā

tūfān kī zad meñ the ḳhayāloñ ke safīne

maiñ ulTā samundar kī taraf bhaag rahā thā

TuTa hua aaina jo raste mein paDa tha

suraj ki tarah meri nigahon mein chubha tha

nam apna hi main sab se khaDa puchh raha tha

kuchh meri samajh mein nahin aaya ki ye kya tha

aankhon ke dariche nazar aate the muqaffal

aur zehn ke kamre mein dhuan phail raha tha

jati hui baraat ne ek lamha ThiThak kar

Thahri hui ek lash pe matam bhi kiya tha

mazi nahin marta hai yaqin aa gaya mujh ko

bita hua har pal wo liye sath khaDa tha

tufan ki zad mein the KHayalon ke safine

main ulTa samundar ki taraf bhag raha tha