TuuTe jo daañt muñh kī shabāhat bigaḌ ga.ī
vo ghar huā ḳharāb jahāñ phuuT paḌ ga.ī
vo zaar huuñ jo saañs dam-e-marg ukhaḌ ga.ī
mayyat kanār-e-gor meñ kāñTe sī gaḌ ga.ī
DhūñDho charāġh le ke za.īfoñ galī galī
ġham ho gayā shabāb javānī bichhaḌ ga.ī
phūlūñ phalūñ maiñ kyā chaman-e-rozgār meñ
maiñ vo nihāl-e-sabz huuñ ghun jis kī jaḌ ga.ī
chāhā jo mālish-e-kaf-e-afsos kījiye
hāthoñ ko ye milā ki hathelī ragaḌ ga.ī
gul aa ke zer-e-kafsh-e-sabā saaf ho gayā
juutī jo be-hayā ke paḌī ḳhaak jhaḌ ga.ī
uqda khulā ye dast-e-hinā band-e-yār se
meñhdī hai apne chor kī mushkeñ jakaḌ ga.ī
vo gul araq-fashāñ nazar aayā jo baaġh meñ
shabnam pe os āb-e-ḳhajālat se paḌ ga.ī
Dhāñpā kafan meñ muñh ko jo sharm-e-gunāh se
mayyat mirī zamīñ meñ ḳhajālat se gaḌ ga.ī
ai 'shād' lucknow kī ḳharābī na pūchhiye
bastī basī-basā.ī guloñ kī ujaḌ ga.ī
TuTe jo dant munh ki shabahat bigaD gai
wo ghar hua KHarab jahan phuT paD gai
wo zar hun jo sans dam-e-marg ukhaD gai
mayyat kanar-e-gor mein kanTe si gaD gai
DhunDho charagh le ke zaifon gali gali
gham ho gaya shabab jawani bichhaD gai
phulun phalun main kya chaman-e-rozgar mein
main wo nihaal-e-sabz hun ghun jis ki jaD gai
chaha jo malish-e-kaf-e-afsos kijiye
hathon ko ye mila ki hatheli ragaD gai
gul aa ke zer-e-kafsh-e-saba saf ho gaya
juti jo be-haya ke paDi KHak jhaD gai
uqda khula ye dast-e-hina band-e-yar se
meinhdi hai apne chor ki mushken jakaD gai
wo gul araq-fashan nazar aaya jo bagh mein
shabnam pe os aab-e-KHajalat se paD gai
Dhanpa kafan mein munh ko jo sharm-e-gunah se
mayyat meri zamin mein KHajalat se gaD gai
ai 'shad' lucknow ki KHarabi na puchhiye
basti basi-basai gulon ki ujaD gai
Source:
Sukhan-e-Bemisal: Deewan-e-Shad (pdf) and website (Pg. p-137 e-139 pdf-144)
-
Author:
Shad Lakhnavi
-
- Edition: 1901
- Publisher: Matbaa Tasweer-e- Alam, Lucknow
- Year of Publication: 1901
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.