TuTi hai meri nind magar tumko is se kya

TuuTī hai merī niiñd magar tum ko is se kyā

bajte raheñ havāoñ se dar tum ko is se kyā

tum mauj mauj misl-e-sabā ghūmte raho

kaT jaa.eñ merī soch ke par tum ko is se kyā

auroñ kā haath thāmo unheñ rāsta dikhāo

maiñ bhuul jā.ūñ apnā hī ghar tum ko is se kyā

abr-e-gurez-pā ko barasne se kyā ġharaz

siipī meñ ban na paa.e guhar tum ko is se kyā

le jaa.eñ mujh ko māl-e-ġhanīmat ke saath adū

tum ne to Daal dī hai sipar tum ko is se kyā

tum ne to thak ke dasht meñ ḳheme lagā liye

tanhā kaTe kisī kā safar tum ko is se kyā

TuTi hai meri nind magar tum ko is se kya

bajte rahen hawaon se dar tum ko is se kya

tum mauj mauj misl-e-saba ghumte raho

kaT jaen meri soch ke par tum ko is se kya

auron ka hath thamo unhen rasta dikhao

main bhul jaun apna hi ghar tum ko is se kya

abr-e-gurez-pa ko barasne se kya gharaz

sipi mein ban na pae guhar tum ko is se kya

le jaen mujh ko mal-e-ghanimat ke sath adu

tum ne to Dal di hai sipar tum ko is se kya

tum ne to thak ke dasht mein KHeme laga liye

tanha kaTe kisi ka safar tum ko is se kya