ubharti Dubti sanson ka silsila kyun hai

ubhartī Dūbtī sāñsoñ kā silsila kyuuñ hai

kabhī ye soch ki jo kuchh huā huā kyuuñ hai

bane haiñ ek hī miTTī se ham sabhī lekin

hamārī soch meñ is darja fāsla kyuuñ hai

lagā rakhā hai ye kis ne kaḌī ko andar se

ujaaḌ ghar kā darīcha Darā Darā kyuuñ hai

abhī to phuul bhī aa.e nahīñ haiñ shāḳhoñ par

abhī se bojh daraḳhtoñ pe paḌ rahā kyuuñ hai

Thahar gayā hai vo aa kar anā ke nuqte par

usī ke saath mirā vaqt ruk gayā kyuuñ hai

tumhīñ ne soch ke bichchhū lagā ke rakkhe the

nahīñ to zaḳhm tumhārā harā-bharā kyuuñ hai

samajh rahā hai ki terī koī sunegā nahīñ

tū apne jism kī chīḳhoñ se boltā kyuuñ hai

ubharti Dubti sanson ka silsila kyun hai

kabhi ye soch ki jo kuchh hua hua kyun hai

bane hain ek hi miTTi se hum sabhi lekin

hamari soch mein is darja fasla kyun hai

laga rakha hai ye kis ne kaDi ko andar se

ujaD ghar ka daricha Dara Dara kyun hai

abhi to phul bhi aae nahin hain shaKHon par

abhi se bojh daraKHton pe paD raha kyun hai

Thahar gaya hai wo aa kar ana ke nuqte par

usi ke sath mera waqt ruk gaya kyun hai

tumhin ne soch ke bichchhu laga ke rakkhe the

nahin to zaKHm tumhaara hara-bhara kyun hai

samajh raha hai ki teri koi sunega nahin

tu apne jism ki chiKHon se bolta kyun hai