udasiyan sahar-o-sham ki nahin achchhi

udāsiyāñ sahar-o-shām kī nahīñ achchhī

'jigar' ye ḳhū dil-e-nākām kī nahīñ achchhī

chhalak chale na kahīñ zarf ai dil-e-maḳhmūr

bahut havas mai-e-gulfām kī nahīñ achchhī

unhīñ ko kartī hai be-ḳhānumāñ jo be-ghar haiñ

ravish ye gardish-e-ayyām kī nahīñ achchhī

kisī kī shān-e-taġhāful se hai vaqār-e-nāz

umiid nāma-o-paiġhām kī nahīñ achchhī

sivā.e kashmakash-o-iztirāb kyā hāsil

kured qismat o anjām kī nahīñ achchhī

dil-e-hazīñ na kahīñ ishq bad-gumāñ ho jaa.e

talāsh rāhat-o-ārām kī nahīñ achchhī

kahīñ ye phūloñ ke iimā se hoñ na murġh-e-asīr

shikāyateñ qafas-o-dām kī nahīñ achchhī

'jigar' ye yaad kahīñ zahr ho na jaa.e tumheñ

jo raT lagī hai kisī naam kī nahīñ achchhī

udasiyan sahar-o-sham ki nahin achchhi

'jigar' ye KHu dil-e-nakaam ki nahin achchhi

chhalak chale na kahin zarf ai dil-e-maKHmur

bahut hawas mai-e-gulfam ki nahin achchhi

unhin ko karti hai be-KHanuman jo be-ghar hain

rawish ye gardish-e-ayyam ki nahin achchhi

kisi ki shan-e-taghaful se hai waqar-e-naz

umid nama-o-paigham ki nahin achchhi

siwae kashmakash-o-iztirab kya hasil

kured qismat o anjam ki nahin achchhi

dil-e-hazin na kahin ishq bad-guman ho jae

talash rahat-o-aram ki nahin achchhi

kahin ye phulon ke ima se hon na murgh-e-asir

shikayaten qafas-o-dam ki nahin achchhi

'jigar' ye yaad kahin zahr ho na jae tumhein

jo raT lagi hai kisi nam ki nahin achchhi