udhar uski nigah ka naz se aa kar palaT jaana

udhar us kī nigah kā naaz se aa kar palaT jaanā

idhar marnā taḌapnā ġhash meñ aanā dam ulaT jaanā

kahūñ kyā kyā maiñ naqshe us kī nāgin zulf ke yaaro

lipaTnā uḌ ke aanā kaaT khānā phir palaT jaanā

agar milne kī dhun rakhnā to is tarkīb se milnā

saraknā duur haTnā bhāgnā aur phir lipaT jaanā

na milne kā irāda ho to ye ayyāriyāñ dekho

humaknā aage baḌhnā paas aanā aur haT jaanā

ye kuchh bahrūp-pan dekho ki ban kar shakl daane kī

bikharnā sabz honā lahlahānā phir simaT jaanā

ye yaktā.ī ye yak-rañgī tis uupar ye qayāmat hai

na kam honā na baḌhnā aur hazāroñ ghaT meñ baT jaanā

'nazīr' aisā jo chanchal dilrubā bahrūpiyā hove

tamāshā hai phir aise shoḳh se saude kā paT jaanā

udhar us ki nigah ka naz se aa kar palaT jaana

idhar marna taDapna ghash mein aana dam ulaT jaana

kahun kya kya main naqshe us ki nagin zulf ke yaro

lipaTna uD ke aana kaT khana phir palaT jaana

agar milne ki dhun rakhna to is tarkib se milna

sarakna dur haTna bhagna aur phir lipaT jaana

na milne ka irada ho to ye ayyariyan dekho

humakna aage baDhna pas aana aur haT jaana

ye kuchh bahrup-pan dekho ki ban kar shakl dane ki

bikharna sabz hona lahlahana phir simaT jaana

ye yaktai ye yak-rangi tis upar ye qayamat hai

na kam hona na baDhna aur hazaron ghaT mein baT jaana

'nazir' aisa jo chanchal dilruba bahrupiya howe

tamasha hai phir aise shoKH se saude ka paT jaana