uf wo ek harf-e-tamanna jo hamare dil mein tha

uf vo ik harf-e-tamannā jo hamāre dil meñ thā

ek tūfāñ thā ki barsoñ hasrat-e-sāhil meñ thā

rafta rafta har tamāshā āñsuoñ meñ Dhal gayā

jaane kyā āñkhoñ ne dekhā aur kyā manzil meñ thā

dāstān-e-ġham se lākhoñ dāstāneñ ban ga.ī

phir bhī vo ik rāz-e-sar-basta rahā jo dil meñ thā

chashm-e-sāqī ke alāva jām-e-ḳhālī ke sivā

kaun apnā āshnā aġhyār kī mahfil meñ thā

mere armānoñ kā markaz mere dardoñ kā ilaaj

TimTimātā sā diyā ik gosha-e-manzil meñ thā

guftugū ke ḳhatm ho jaane par aayā ye ḳhayāl

jo zabāñ tak aa nahīñ paayā vahī to dil meñ thā

miT ga.iiñ imroz o fardā kī hazāroñ uljhaneñ

jo sukūñ tūfāñ meñ paayā hai vo kab sāhil meñ thā

uf wo ek harf-e-tamanna jo hamare dil mein tha

ek tufan tha ki barson hasrat-e-sahil mein tha

rafta rafta har tamasha aansuon mein Dhal gaya

jaane kya aankhon ne dekha aur kya manzil mein tha

dastan-e-gham se lakhon dastanen ban gai

phir bhi wo ek raaz-e-sar-basta raha jo dil mein tha

chashm-e-saqi ke alawa jam-e-KHali ke siwa

kaun apna aashna aghyar ki mahfil mein tha

mere armanon ka markaz mere dardon ka ilaj

TimTimata sa diya ek gosha-e-manzil mein tha

guftugu ke KHatm ho jaane par aaya ye KHayal

jo zaban tak aa nahin paya wahi to dil mein tha

miT gain imroz o farda ki hazaron uljhanen

jo sukun tufan mein paya hai wo kab sahil mein tha