uljhanon mein kaise itminan-e-dil paida karen

uljhanoñ meñ kaise itmīnān-e-dil paidā kareñ

bijliyoñ meñ rah ke tinkoñ kā bharosa kyā kareñ

zabt aañsū jab kiye to uchhlā chehre par lahū

ġham kī maujeñ rokne se rāsta paidā kareñ

kahte haiñ qissa zamāne se yahī tashvīsh hai

sī liye haiñ lab magar in āñsuoñ ko kyā kareñ

ham bhī bande haiñ hameñ bhī maqdarat itnī to hai

vo ḳhudā ban jaa.e jis ke sāmne sajda kareñ

tāqat-e-dīdār zāhir aur āñkhoñ ko ye shauq

bas tumheñ dekhā kareñ dekhā kareñ dekhā kareñ

chāhte ye haiñ ki rāh-e-zindagī hamvār ho

sochte ye haiñ ki duniyā ko tah-o-bālā kareñ

bevafā sūraj Dhalā jaatā hai chashm-e-shauq se

aur kab tak e'tibār-e-vāda-e-fardā kareñ

maslahat kā ye taqāzā hai ki hañsnā chāhiye

bazm-e-hastī meñ 'sabā' kab tak ġham-e-duniyā kareñ

uljhanon mein kaise itminan-e-dil paida karen

bijliyon mein rah ke tinkon ka bharosa kya karen

zabt aansu jab kiye to uchhla chehre par lahu

gham ki maujen rokne se rasta paida karen

kahte hain qissa zamane se yahi tashwish hai

si liye hain lab magar in aansuon ko kya karen

hum bhi bande hain hamein bhi maqdarat itni to hai

wo KHuda ban jae jis ke samne sajda karen

taqat-e-didar zahir aur aankhon ko ye shauq

bas tumhein dekha karen dekha karen dekha karen

chahte ye hain ki rah-e-zindagi hamwar ho

sochte ye hain ki duniya ko tah-o-baala karen

bewafa suraj Dhala jata hai chashm-e-shauq se

aur kab tak e'tibar-e-wada-e-farda karen

maslahat ka ye taqaza hai ki hansna chahiye

bazm-e-hasti mein 'saba' kab tak gham-e-duniya karen