umr be-wajh na be-rabt guzari jae

umr be-vaj.h na be-rabt guzārī jaa.e

aa.ina dekh ke tasvīr utārī jaa.e

vahī kamra vahī ḳhushbū vahī har shab kī ghuTan

aaj kī raat kahīñ aur guzārī jaa.e

yuuñ zarūrat kī dukāñ se hai ta'alluq us kā

jaise chaurāhe pe har roz bhikārī jaa.e

ḳhauf āñkhoñ ke kaToroñ se chhalak jā.egā

musht-bhar ḳhaak sahī chehre pe maarī jaa.e

hai khañDar jism magar ruuh kī taskīñ ke liye

būḌhī dīvār kisī tarah sañvārī jaa.e

shaam hī se mire bistar kī shikan kahtī hai

aaj bhī kal kī tarah raat na bhārī jaa.e

apne takiye pe likhā us ne ye misrā 'ājiz'

aañkh lag jaa.e to phir chīḳh na maarī jaa.e

umr be-wajh na be-rabt guzari jae

aaina dekh ke taswir utari jae

wahi kamra wahi KHushbu wahi har shab ki ghuTan

aaj ki raat kahin aur guzari jae

yun zarurat ki dukan se hai ta'alluq us ka

jaise chaurahe pe har roz bhikari jae

KHauf aankhon ke kaToron se chhalak jaega

musht-bhar KHak sahi chehre pe mari jae

hai khanDar jism magar ruh ki taskin ke liye

buDhi diwar kisi tarah sanwari jae

sham hi se mere bistar ki shikan kahti hai

aaj bhi kal ki tarah raat na bhaari jae

apne takiye pe likha us ne ye misra 'ajiz'

aankh lag jae to phir chiKH na mari jae