unki nazar ka lutf numayan nahin raha

un kī nazar kā lutf numāyāñ nahīñ rahā

ham par vo iltifāt-e-nigārāñ nahīñ rahā

dil-bastagī-o-aish kā sāmāñ nahīñ rahā

ḳhush-bāshī-e-hayāt kā sāmāñ nahīñ rahā

ye bhī nahīñ ki gul meñ latāfat nahīñ rahī

par jannat-nigāh gulistāñ nahīñ rahā

har be-hunar se garm hai bāzār-e-siflagī

ahl-e-hunar ke vāste maidāñ nahīñ rahā

apnī zabān apnā tamaddun badal gayā

lutf-e-kalām ab vo suḳhan-dāñ nahīñ rahā

kyuuñ ab tavāf-e-kū-e-malāmat se hai gurez

kyā vo junūn-e-kūcha-e-jānāñ nahīñ rahā

sīkhā hai hādsāt-e-zamāna se khelnā

ham ko hirās-e-mauja-e-tūfāñ nahīñ rahā

har bait jis ke faiz se bait-ul-ġhazal bane

ab vo surūr-e-chashm-e-ġhazālāñ nahīñ rahā

dīvāngī-e-shauq ke qurbān jā.iye

ab imtiyāz-e-jeb-o-garebāñ nahīñ rahā

pīr-e-muġhāñ kī bai.at-e-kāmil ke faiz se

ab shaiḳh naam kā bhī musalmāñ nahīñ rahā

un kī nigāh-e-nāz kā ye iltifāt hai

chāragaroñ kā ziist par ehsāñ nahīñ rahā

kyā haal hai tumhārā azīzān-e-lucknow

tahzīb-e-ahl-e-dillī kā pursāñ nahīñ rahā

har shai hai is jahān meñ lekin ḳhudā-gavāh

'gulzār' is dayār meñ insāñ nahīñ rahā

un ki nazar ka lutf numayan nahin raha

hum par wo iltifat-e-nigaran nahin raha

dil-bastagi-o-aish ka saman nahin raha

KHush-bashi-e-hayat ka saman nahin raha

ye bhi nahin ki gul mein latafat nahin rahi

par jannat-nigah gulistan nahin raha

har be-hunar se garm hai bazar-e-siflagi

ahl-e-hunar ke waste maidan nahin raha

apni zaban apna tamaddun badal gaya

lutf-e-kalam ab wo suKHan-dan nahin raha

kyun ab tawaf-e-ku-e-malamat se hai gurez

kya wo junun-e-kucha-e-jaanan nahin raha

sikha hai hadsat-e-zamana se khelna

hum ko hiras-e-mauja-e-tufan nahin raha

har bait jis ke faiz se bait-ul-ghazal bane

ab wo surur-e-chashm-e-ghazalan nahin raha

diwangi-e-shauq ke qurban jaiye

ab imtiyaz-e-jeb-o-gareban nahin raha

pir-e-mughan ki baiat-e-kaamil ke faiz se

ab shaiKH nam ka bhi musalman nahin raha

un ki nigah-e-naz ka ye iltifat hai

chaaragaron ka zist par ehsan nahin raha

kya haal hai tumhaara azizan-e-lucknow

tahzib-e-ahl-e-dilli ka pursan nahin raha

har shai hai is jahan mein lekin KHuda-gawah

'gulzar' is dayar mein insan nahin raha