un kī raftār se dil kā ajab ahvāl huā
ruñdh gayā pis gayā miTTī huā pāmāl huā
dasht-e-vahshat kā ilāqa mujhe imsāl huā
dāġh-e-sauda sifat-e-nayyar-e-iqbāl huā
is bakheḌe se ilāhī kahīñ chhuTkārā ho
ishq-e-gesū na huā jaan kā janjāl huā
nazar-e-lutf na kī tū ne mire rone par
tifl-e-ashk ai mah-e-ḳhūbī na ḳhush-iqbāl huā
haiñ vo suufī jo kabhī nāla-e-nāqūs sunā
vajd karne lage ham dil kā ajab haal huā
paḌ gayā un pe mire pech meñ laane kā vabāl
kyā pareshān tire gesuoñ kā haal huā
daulat-e-faqr ho ai mun.imo aur kamlī ho
faḳhr kyā hai jo do-shāla huā rūmāl huā
apnī qismat kā navishta jo dikhāyā ham ne
hashr ke roz ġhalat nāma-e-a.amāl huā
āsmāñ ne mujhe mahrūm-e-shahādat rakkhā
teġh-e-qātil ke liye baḳht-e-siyah-e-Dhāl huā
log kahne lage kundan pe chaḌhā.e miinā
sabza-e-ḳhat se vo ḳhush-rañg tirā gaal huā
teġh-e-husn ai gul-e-tar ho ga.ī ḳhūn-ālūda
mujh pe ġhusse meñ terā muñh jo bahut laal huā
tā.ir-e-dil kī liye aap ne sayyādī kī
rishta-e-dām-e-balā zulf kā har baal huā
lā-makāñ tak kahīñ Thahrā na mirā pā-e-ḳhayāl
mazra-e-sabz-e-falak biich meñ pāmāl huā
ai 'sabā' aap ri.āyat na kareñ lafzoñ kī
zar-e-gul paayā jo gulchīñ ne to kyā maal huā
un ki raftar se dil ka ajab ahwal hua
rundh gaya pis gaya miTTi hua pamal hua
dasht-e-wahshat ka ilaqa mujhe imsal hua
dagh-e-sauda sifat-e-nayyar-e-iqbaal hua
is bakheDe se ilahi kahin chhuTkara ho
ishq-e-gesu na hua jaan ka janjal hua
nazar-e-lutf na ki tu ne mere rone par
tifl-e-ashk ai mah-e-KHubi na KHush-iqbaal hua
hain wo sufi jo kabhi nala-e-naqus suna
wajd karne lage hum dil ka ajab haal hua
paD gaya un pe mere pech mein lane ka wabaal
kya pareshan tere gesuon ka haal hua
daulat-e-faqr ho ai munimo aur kamli ho
faKHr kya hai jo do-shaala hua rumal hua
apni qismat ka nawishta jo dikhaya hum ne
hashr ke roz ghalat nama-e-amal hua
aasman ne mujhe mahrum-e-shahadat rakkha
tegh-e-qatil ke liye baKHt-e-siyah-e-Dhaal hua
log kahne lage kundan pe chaDhae mina
sabza-e-KHat se wo KHush-rang tera gal hua
tegh-e-husn ai gul-e-tar ho gai KHun-aluda
mujh pe ghusse mein tera munh jo bahut lal hua
tair-e-dil ki liye aap ne sayyaadi ki
rishta-e-dam-e-bala zulf ka har baal hua
la-makan tak kahin Thahra na mera pa-e-KHayal
mazra-e-sabz-e-falak bich mein pamal hua
ai 'saba' aap riayat na karen lafzon ki
zar-e-gul paya jo gulchin ne to kya mal hua
Source:
Ghuncha-e-Arzu (Pg. 6)
-
Author:
Wazir Ali Saba Lakhnavi
-
- Edition: 1856
- Publisher: Matba Mohammadi, Lucnow
- Year of Publication: 1856
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.