us husn ke nam pe yaad aae sab manzar faiz ki nazmon ke

us husn ke naam pe yaad aa.e sab manzar 'faiz' kī nazmoñ ke

vahī rang-e-hinā vahī band-e-qabā vahī phuul khile pairāhan meñ

kuchh vo jinheñ ham se nisbat thī un kūchoñ meñ aan ābād hue

kuchh arsh pe taare kahlā.e kuchh phuul bane jā gulshan meñ

ham logoñ ke aane se pahle bhī tum log udhar se guzarte the

kabhī phuul bhī dekhe ġhurfoñ meñ kabhī qaus-e-quzah kisī chilman meñ

yuuñ karne ko ishq pe qaid nahīñ sab karte haiñ achchhā karte haiñ

par ham se bahut bhī nahīñ guzre kuchh log the misr-o-madyan meñ

ham un se jo mil kar duur hue kuchh ḳhush hue kuchh ranjūr hue

ab dil kā Thikāna mushkil hai haañ jaan rahegī aiman meñ

us husn ke nam pe yaad aae sab manzar 'faiz' ki nazmon ke

wahi rang-e-hina wahi band-e-qaba wahi phul khile pairahan mein

kuchh wo jinhen hum se nisbat thi un kuchon mein aan aabaad hue

kuchh arsh pe tare kahlae kuchh phul bane ja gulshan mein

hum logon ke aane se pahle bhi tum log udhar se guzarte the

kabhi phul bhi dekhe ghurfon mein kabhi qaus-e-quzah kisi chilman mein

yun karne ko ishq pe qaid nahin sab karte hain achchha karte hain

par hum se bahut bhi nahin guzre kuchh log the misr-o-madyan mein

hum un se jo mil kar dur hue kuchh KHush hue kuchh ranjur hue

ab dil ka Thikana mushkil hai han jaan rahegi aiman mein