uski nazron mein intiKHab hua

us kī nazroñ meñ intiḳhāb huā

dil ajab husn se ḳharāb huā

ishq kā sehr kāmyāb huā

maiñ tirā tū mirā javāb huā

har nafas mauj-e-iztirāb huā

zindagī kyā huī azaab huā

jazba-e-shauq kāmyāb huā

aaj mujh se unheñ hijāb huā

maiñ banūñ kis liye na mast-e-sharāb

kyuuñ mujassam koī shabāb huā

nigah-e-nāz le ḳhabar varna

dard mahbūb-e-iztirāb huā

merī barbādiyāñ durust magar

tū batā kyā tujhe savāb huā

ain qurbat bhī ain furqat bhī

haa.e vo qatra jo habāb huā

mastiyāñ har taraf haiñ āvāra

kaun ġhārat-gar-e-sharāb huā

dil ko chhūnā na ai nasīm-e-karam

ab ye dil rau-kash-e-habāb huā

ishq-e-be-imtiyāz ke hāthoñ

husn ḳhud bhī shikast-yāb huā

jab vo aa.e to pesh-tar sab se

merī āñkhoñ ko izn-e-ḳhvāb huā

dil kī har chiiz jagmagā uTThī

aaj shāyad vo be-naqāb huā

daur-e-hañgāma-e-nashāt na pūchh

ab vo sab kuchh ḳhayāl o ḳhvāb huā

tū ne jis ashk par nazar Daalī

josh khā kar vahī sharāb huā

sitam-e-ḳhās-e-yār kī hai qasam

karam-e-yār be-hisāb huā

us ki nazron mein intiKHab hua

dil ajab husn se KHarab hua

ishq ka sehr kaamyab hua

main tera tu mera jawab hua

har nafas mauj-e-iztirab hua

zindagi kya hui azab hua

jazba-e-shauq kaamyab hua

aaj mujh se unhen hijab hua

main banun kis liye na mast-e-sharab

kyun mujassam koi shabab hua

nigah-e-naz le KHabar warna

dard mahbub-e-iztirab hua

meri barbaadiyan durust magar

tu bata kya tujhe sawab hua

ain qurbat bhi ain furqat bhi

hae wo qatra jo habab hua

mastiyan har taraf hain aawara

kaun ghaarat-gar-e-sharab hua

dil ko chhuna na ai nasim-e-karam

ab ye dil rau-kash-e-habab hua

ishq-e-be-imtiyaz ke hathon

husn KHud bhi shikast-yab hua

jab wo aae to pesh-tar sab se

meri aankhon ko izn-e-KHwab hua

dil ki har chiz jagmaga uTThi

aaj shayad wo be-naqab hua

daur-e-hangama-e-nashat na puchh

ab wo sab kuchh KHayal o KHwab hua

tu ne jis ashk par nazar Dali

josh kha kar wahi sharab hua

sitam-e-KHas-e-yar ki hai qasam

karam-e-yar be-hisab hua