اس کی تو روٹھتے اور اپنی مناتے گزری

اس کی تو روٹھتے اور اپنی مناتے گزری

زندگی حسن کے بس ناز اٹھاتے گزری

اب بھی کیا منزل مقصود نہیں ملتی ہمیں

جب ہر اک راہ طلب ٹھوکریں کھاتے گزری

آج بھی ہجر کی ظلمت سے رہا کمرہ محیط

آج کی شب بھی چراغوں کو جلاتے گزری

بد گمانی کی کچھ اس طرح چلی تیز ہوا

جو مرے پیار کی دنیا کو مٹاتے گزری

میں کہ جب تک رہا محفل میں تری ہر ساعت

مجھ کو محرومی کا احساس دلاتے گزری

خوش نما زندگی جینے کے لیے عمر رواں

موت کی سمت قدم اپنے بڑھاتے گزری

اس کی ناکامی پہ اس درجہ تعجب کیسا

زندگی خاک تھی اور خاک اڑاتے گزری

مہرباں تھی مری قسمت مری نااہلی پر

ہر گھڑی بگڑی ہوئی بات بناتے گزری