usko chhune ko kai hath nikal kar aae

us ko chhūne ko ka.ī haath nikal kar aa.e

chāñd se kis ne kahā thā ki vo chhat par aa.e

ho uThā phir se siyāsat meñ samundar manthan

zahr piine ke liye phir koī shankar aa.e

tum ne āñkheñ to khulī rakkhī haiñ apnī lekin

dil kā darvāza khule tab koī andar aa.e

maiñ to farhād nahīñ qais bhī rāñjhā bhī nahīñ

kyuuñ mirī samt har ik samt se patthar aa.e

ġham meñ Duubī huī ġhazloñ ke jo aañsū poñchhe

aisā koī to zamāne meñ suḳhanvar aa.e

maiñ vo dariyā huuñ jo ghar se kabhī niklā hī nahīñ

pyaas le kar merī chaukhaT pe samundar aa.e

us ko chhune ko kai hath nikal kar aae

chand se kis ne kaha tha ki wo chhat par aae

ho uTha phir se siyasat mein samundar manthan

zahr pine ke liye phir koi shankar aae

tum ne aankhen to khuli rakkhi hain apni lekin

dil ka darwaza khule tab koi andar aae

main to farhad nahin qais bhi ranjha bhi nahin

kyun meri samt har ek samt se patthar aae

gham mein Dubi hui ghazlon ke jo aansu ponchhe

aisa koi to zamane mein suKHanwar aae

main wo dariya hun jo ghar se kabhi nikla hi nahin

pyas le kar meri chaukhaT pe samundar aae