usko mere afsane mein kya jaane kya baat mili

us ko mere afsāne meñ kyā jaane kyā baat milī

chāñd se ruḳh par ġham ke bādal āñkhoñ meñ barsāt milī

bas itnī sī baat thī us kī zulf zarā lahrā.ī thī

ḳhauf-zada har shaam kā manzar sahmī sī har raat milī

daulat aur shohrat logoñ ne qismat se aage paa.ī

aur musībat bhī ham ko to bas hasab-e-auqāt milī

vo jis ko kuchh fikr nahīñ hai har ġham se anjān hai jo

pag-pag us kī rāhguzar meñ ashkoñ kī bārāt milī

sab ummīdeñ TuuT chukī thiiñ dil thā mahv-e-yās 'aqīl'

aur dāman thā purze purze jab ham ko ḳhairāt milī

us ko mere afsane mein kya jaane kya baat mili

chand se ruKH par gham ke baadal aankhon mein barsat mili

bas itni si baat thi us ki zulf zara lahrai thi

KHauf-zada har sham ka manzar sahmi si har raat mili

daulat aur shohrat logon ne qismat se aage pai

aur musibat bhi hum ko to bas hasab-e-auqat mili

wo jis ko kuchh fikr nahin hai har gham se anjaan hai jo

pag-pag us ki rahguzar mein ashkon ki baraat mili

sab ummiden TuT chuki thin dil tha mahw-e-yas 'aqil'

aur daman tha purze purze jab hum ko KHairaat mili