اس مسیحائی کے صدقے کام جاں تک آ گئی

اس مسیحائی کے صدقے کام جاں تک آ گئی

تجربے کرتے ہوئے نوبت یہاں تک آ گئی

اب تو گہواروں پہ خادم رکھ لیے ماں باپ نے

مامتا تخمینۂ سود و زیاں تک آ گئی

تو نے کوشش تو یہی کہ تھی کہ گھر میرا جلے

آگ جب بھڑکی تو پھر تیرے مکاں تک آ گئی

اس نظام آب و گل میں زہر پھیلانے کے بعد

پھر وہی شورش زمیں سے آسماں تک آ گئی

مجھ میں اور دنیا میں پھر کیا فرق ہوگا دوستو

زندگی کی ہے جو تلخی گر زباں تک آ گئی

اتنی قربت تھی ہماری اپنے تیر انداز سے

دھار خوں کی جسم سے نکلی کماں تک آ گئی

بند یہ اپنے تشخص کا نہ بہہ جائے کہیں

موج سیل تند خطرے کے نشاں تک آ گئی