usne aahista se jab pukara mujhe

us ne āhista se jab pukārā mujhe

jhuk ke takne lagā har sitārā mujhe

terā ġham is fishār-e-shab-o-roz meñ

hone detā nahīñ be-sahārā mujhe

har sitāre kī bujhtī huī raushnī

mere hone kā hai isti.ārā mujhe

ai ḳhudā koī aisā bhī hai mo'jiza

jo ki mujh par kare āshkārā mujhe

koī sūraj nahīñ koī taarā nahīñ

tū ne kis jhuTpuTe meñ utārā mujhe

aks-e-imroz meñ naqsh-e-dīroz meñ

ik ishārā tujhe ik ishārā mujhe

haiñ azal tā abad TūTte aa.ine

āgahī ne kahāñ lā ke maarā mujhe

us ne aahista se jab pukara mujhe

jhuk ke takne laga har sitara mujhe

tera gham is fishaar-e-shab-o-roz mein

hone deta nahin be-sahaara mujhe

har sitare ki bujhti hui raushni

mere hone ka hai istiara mujhe

ai KHuda koi aisa bhi hai mo'jiza

jo ki mujh par kare aashkara mujhe

koi suraj nahin koi tara nahin

tu ne kis jhuTpuTe mein utara mujhe

aks-e-imroz mein naqsh-e-diroz mein

ek ishaara tujhe ek ishaara mujhe

hain azal ta abad TuTte aaine

aagahi ne kahan la ke mara mujhe