us par tumhaare pyar ka ilzam bhi to hai

us par tumhāre pyaar kā ilzām bhī to hai

achchhā sahī 'qatīl' pa badnām bhī to hai

āñkheñ har ik hasīn kī be-faiz to nahīñ

kuchh sāgaroñ meñ bāda-e-gulfām bhī to hai

palkoñ pe ab nahīñ hai vo pahlā sā bār-e-ġham

rone ke ba.ad kuchh hameñ ārām bhī to hai

āḳhir burī hai kyā dil-e-nākām kī ḳhalish

saath us ke ek lazzat-e-be-nām bhī to hai

kar to liyā hai qasd ibādat kī raat kā

raste meñ jhūmtī huī ik shaam bhī to hai

ham jānte haiñ jis ko kisī aur naam se

ik naam us kā gardish-e-ayyām bhī to hai

a tishna-kām-e-shauq ise aazmā ke dekh

vo aañkh sirf aañkh nahīñ jaam bhī to hai

munkir nahīñ koī bhī vafā kā magar 'qatīl'

duniyā ke sāmne mirā anjām bhī to hai

us par tumhaare pyar ka ilzam bhi to hai

achchha sahi 'qatil' pa badnam bhi to hai

aankhen har ek hasin ki be-faiz to nahin

kuchh sagaron mein baada-e-gulfam bhi to hai

palkon pe ab nahin hai wo pahla sa bar-e-gham

rone ke baad kuchh hamein aaram bhi to hai

aaKHir buri hai kya dil-e-nakaam ki KHalish

sath us ke ek lazzat-e-be-nam bhi to hai

kar to liya hai qasd ibaadat ki raat ka

raste mein jhumti hui ek sham bhi to hai

hum jaante hain jis ko kisi aur nam se

ek nam us ka gardish-e-ayyam bhi to hai

a tishna-kaam-e-shauq ise aazma ke dekh

wo aankh sirf aankh nahin jam bhi to hai

munkir nahin koi bhi wafa ka magar 'qatil'

duniya ke samne mera anjam bhi to hai