use ab ke wafaon se guzar jaane ki jaldi thi

use ab ke vafāoñ se guzar jaane kī jaldī thī

magar is baar mujh ko apne ghar jaane kī jaldī thī

irāda thā ki maiñ kuchh der tūfāñ kā maza letā

magar bechāre dariyā ko utar jaane kī jaldī thī

maiñ apnī muTThiyoñ meñ qaid kar letā zamīnoñ ko

magar mere qabīle ko bikhar jaane kī jaldī thī

maiñ āḳhir kaun sā mausam tumhāre naam kar detā

yahāñ har ek mausam ko guzar jaane kī jaldī thī

vo shāḳhoñ se judā hote hue pattoñ pe hañste the

baḌe zinda-nazar the jin ko mar jaane kī jaldī thī

maiñ sābit kis tarah kartā ki har ā.īna jhūTā hai

ka.ī kam-zarf chehroñ ko utar jaane kī jaldī thī

use ab ke wafaon se guzar jaane ki jaldi thi

magar is bar mujh ko apne ghar jaane ki jaldi thi

irada tha ki main kuchh der tufan ka maza leta

magar bechaare dariya ko utar jaane ki jaldi thi

main apni muTThiyon mein qaid kar leta zaminon ko

magar mere qabile ko bikhar jaane ki jaldi thi

main aaKHir kaun sa mausam tumhaare nam kar deta

yahan har ek mausam ko guzar jaane ki jaldi thi

wo shaKHon se juda hote hue patton pe hanste the

baDe zinda-nazar the jin ko mar jaane ki jaldi thi

main sabit kis tarah karta ki har aaina jhuTa hai

kai kam-zarf chehron ko utar jaane ki jaldi thi