use main talash kahan karun wo uruj hai main zawal hun

use maiñ talāsh kahāñ karūñ vo 'urūj hai maiñ zavāl huuñ

ġham-e-mustaqil mirā hal kahāñ vo javāb hai maiñ savāl huuñ

na.e mausamoñ kī huuñ aarzū na.ī rif.atoñ kī huuñ justujū

mujhe toḌ ḳhvāb-e-jahān-e-nau maiñ tilism-e-bāb-e-ḳhayāl huuñ

mire aa.ine kī kudūrateñ mirī apnī zaat kī gard haiñ

mujhe kab malāl kisī se ho ki maiñ aap apnā ma.aal huuñ

mirī bandagī ke ye mashġhale ki ḳhudā.ī se bhī muāmle

kabhī ḳhud hī dast-e-karīm huuñ kabhī ḳhud hī dast-e-savāl huuñ

ye buland-o-past-e-jahān-e-dil kahīñ hausle kahīñ marhale

kabhī huuñ maiñ auj-e-ḳhayāl par kabhī zo'f-e-jāñ se niDhāl huuñ

kabhī khil ga.ī jo koī kalī to payām-e-shauq galī galī

kabhī aa ga.ī jo havā-e-ġham to maiñ gard-e-bād-e-malāl huuñ

kabhī mujh se soz-e-hayāt le kabhī mujh se sāz-e-hayāt sun

maiñ fazā-e-qarya-e-hijr huuñ maiñ havā-e-shahr-e-visāl huuñ

kabhī maiñ asīr-e-makāñ huā kabhī māvarā-e-zamāñ huā

kabhī aaj meñ kabhī kal meñ huuñ maiñ ajiib sūrat-e-hāl huuñ

koī apne aap se hai mafar na hoñ apnī zaat se bā-ḳhabar

maiñ talāsh apnī kahāñ karūñ ki maiñ aap apnī misāl huuñ

maiñ huuñ apnī zaat meñ ḳhud chaman maiñ huuñ 'bāqar' apne numū kā fan

kabhī ġhunchagī meñ girafta-dil kabhī josh-e-jāñ se nihāñ huuñ

use main talash kahan karun wo 'uruj hai main zawal hun

gham-e-mustaqil mera hal kahan wo jawab hai main sawal hun

nae mausamon ki hun aarzu nai rifaton ki hun justuju

mujhe toD KHwab-e-jahan-e-nau main tilism-e-bab-e-KHayal hun

mere aaine ki kuduraten meri apni zat ki gard hain

mujhe kab malal kisi se ho ki main aap apna maal hun

meri bandagi ke ye mashghale ki KHudai se bhi muamle

kabhi KHud hi dast-e-karim hun kabhi KHud hi dast-e-sawal hun

ye buland-o-past-e-jahan-e-dil kahin hausle kahin marhale

kabhi hun main auj-e-KHayal par kabhi zo'f-e-jaan se niDhaal hun

kabhi khil gai jo koi kali to payam-e-shauq gali gali

kabhi aa gai jo hawa-e-gham to main gard-e-baad-e-malal hun

kabhi mujh se soz-e-hayat le kabhi mujh se saz-e-hayat sun

main faza-e-qarya-e-hijr hun main hawa-e-shahr-e-visal hun

kabhi main asir-e-makan hua kabhi mawara-e-zaman hua

kabhi aaj mein kabhi kal mein hun main ajib surat-e-haal hun

koi apne aap se hai mafar na hon apni zat se ba-KHabar

main talash apni kahan karun ki main aap apni misal hun

main hun apni zat mein KHud chaman main hun 'baqar' apne numu ka fan

kabhi ghunchagi mein girafta-dil kabhi josh-e-jaan se nihan hun