use mana kar ghurur us ka baDha na dena

use manā kar ġhurūr us kā baḌhā na denā

vo sāmne aa.e bhī to us ko sadā na denā

ḳhulūs ko jo ḳhushāmadoñ meñ shumār kar leñ

tum aise logoñ ko tohfatan bhī vafā na denā

vo jis kī Thokar meñ ho sambhalne kā dars shāmil

tum aise patthar ko rāste se haTā na denā

sazā gunāhoñ kī denā us ko zarūr lekin

vo aadmī hai tum us kī azmat ghaTā na denā

jahāñ rifāqat ho fitna-pardāz maulvī kī

bahisht aisī kisī ko mere ḳhudā na denā

'qatīl' mujh ko yahī sikhāyā mire nabī ne

ki fat.h pā kar bhī dushmanoñ ko sazā na denā

use mana kar ghurur us ka baDha na dena

wo samne aae bhi to us ko sada na dena

KHulus ko jo KHushamadon mein shumar kar len

tum aise logon ko tohfatan bhi wafa na dena

wo jis ki Thokar mein ho sambhalne ka dars shamil

tum aise patthar ko raste se haTa na dena

saza gunahon ki dena us ko zarur lekin

wo aadmi hai tum us ki azmat ghaTa na dena

jahan rifaqat ho fitna-pardaz maulwi ki

bahisht aisi kisi ko mere KHuda na dena

'qatil' mujh ko yahi sikhaya mere nabi ne

ki fath pa kar bhi dushmanon ko saza na dena