uThaya faeda jis ne hamesha be-zabani ka

uThāyā fā.eda jis ne hamesha be-zabānī kā

vahī to markazī kirdār thā merī kahānī kā

ḳhayānat bhī na ho paa.ī thī roza-dār āñkhoñ se

vo kaffāre meñ kar baiThe taqāzā zindagānī kā

sar-e-taslīm ḳham kar de vo mere rū-barū aa kar

agar ehsās ho jaa.e mirī āñkhoñ ke paanī kā

sar-e-mahfil usī ne kar diyā be-ābrū āḳhir

kiyā kartā thā jo dā'vā hamārī pāsbānī kā

lage haiñ dil pe jitne zaḳhm sab nāsūr ho jaate

lagā letī agar marham tumhārī mehrbānī kā

sabhī kuchh chhin chukā hai dar-ba-dar bhī ho ga.e phir bhī

nasha utrā nahīñ zehnoñ se ab tak hukmrānī kā

nahīñ dekhā gayā ye bhī 'habība' ahl-e-duniyā se

baḌī mushkil se haath aayā thā lamha shādmānī kā

uThaya faeda jis ne hamesha be-zabani ka

wahi to markazi kirdar tha meri kahani ka

KHayanat bhi na ho pai thi roza-dar aankhon se

wo kaffare mein kar baiThe taqaza zindagani ka

sar-e-taslim KHam kar de wo mere ru-baru aa kar

agar ehsas ho jae meri aankhon ke pani ka

sar-e-mahfil usi ne kar diya be-abru aaKHir

kiya karta tha jo da'wa hamari pasbani ka

lage hain dil pe jitne zaKHm sab nasur ho jate

laga leti agar marham tumhaari mehrbani ka

sabhi kuchh chhin chuka hai dar-ba-dar bhi ho gae phir bhi

nasha utra nahin zehnon se ab tak hukmrani ka

nahin dekha gaya ye bhi 'habiba' ahl-e-duniya se

baDi mushkil se hath aaya tha lamha shadmani ka