waiz ke main zarur Darane se Dar gaya

vaa.iz ke maiñ zarūr Darāne se Dar gayā

jām-e-sharāb laa.e bhī saaqī kidhar gayā

bulbul kahāñ bahār kahāñ bāġhbāñ kahāñ

vo din guzar ga.e vo zamāna guzar gayā

aisī havā chalī mirī aahoñ kī raat ko

sab āsmāñ pe ḳhirman-e-anjum bikhar gayā

achchhā huā jo ho ga.e vahdat-parast ham

fitna gayā fasād gayā shor-o-shar gayā

ka.abe kī samt sajda kiyā dil ko chhoḌ kar

tū kis taraf thā dhyān hamārā kidhar gayā

phir sair-e-lāla-zār ko ham ai 'sabā' chale

aa.ī bahār dāġh-e-junūñ phir ubhar gayā

waiz ke main zarur Darane se Dar gaya

jam-e-sharab lae bhi saqi kidhar gaya

bulbul kahan bahaar kahan baghban kahan

wo din guzar gae wo zamana guzar gaya

aisi hawa chali meri aahon ki raat ko

sab aasman pe KHirman-e-anjum bikhar gaya

achchha hua jo ho gae wahdat-parast hum

fitna gaya fasad gaya shor-o-shar gaya

kabe ki samt sajda kiya dil ko chhoD kar

tu kis taraf tha dhyan hamara kidhar gaya

phir sair-e-lala-zar ko hum ai 'saba' chale

aai bahaar dagh-e-junun phir ubhar gaya