wafa ka banda hun ulfat ka pasdar hun main

vafā kā banda huuñ ulfat kā pāsdār huuñ maiñ

Harīf-e-qamrī-o-parvāna-e-hazār huuñ maiñ

judā judā nazar aatī hai jalva-e-tāsīr

qarār ho gayā muusā ko be-qarār huuñ maiñ

ḳhumār jis se na vāqif ho vo surūr haiñ aap

surūr jis se na āgāh ho vo ḳhumār huuñ maiñ

samā gayā hai ye saudā ajiib sar meñ mire

karam kā ahl-e-sitam se ummīd-vār huuñ maiñ

evaz davā ke duā de gayā tabīb mujhe

kahā jo maiñ ne ġham-e-hijr se do-chār huuñ maiñ

shabāb kar diyā merā tabāh ulfat ne

ḳhizāñ ke haath kī boī huī bahār huuñ maiñ

qarār-dād-e-garebāñ huī ye dāman se

ki purze purze agar ho to taar taar huuñ maiñ

mire mazār ko samjhā na jaa.e ek mazār

hazār hasrat-o-armāñ kā ḳhud mazār huuñ maiñ

'zahīr' o 'arshad' o 'ġhālib' kā huuñ jigar-gosha

janāb-e-'dāġh' kā tilmīz o yādgār huuñ maiñ

amiir karte haiñ izzat mirī huuñ vo 'sā.il'

guloñ ke pahlū meñ rahtā huuñ aisā ḳhaar huuñ maiñ

wafa ka banda hun ulfat ka pasdar hun main

Harif-e-qamri-o-parwana-e-hazar hun main

juda juda nazar aati hai jalwa-e-tasir

qarar ho gaya musa ko be-qarar hun main

KHumar jis se na waqif ho wo surur hain aap

surur jis se na aagah ho wo KHumar hun main

sama gaya hai ye sauda ajib sar mein mere

karam ka ahl-e-sitam se ummid-war hun main

ewaz dawa ke dua de gaya tabib mujhe

kaha jo main ne gham-e-hijr se do-chaar hun main

shabab kar diya mera tabah ulfat ne

KHizan ke hath ki boi hui bahaar hun main

qarar-dad-e-gareban hui ye daman se

ki purze purze agar ho to tar tar hun main

mere mazar ko samjha na jae ek mazar

hazar hasrat-o-arman ka KHud mazar hun main

'zahir' o 'arshad' o 'ghaalib' ka hun jigar-gosha

janab-e-'dagh' ka tilmiz o yaadgar hun main

amir karte hain izzat meri hun wo 'sail'

gulon ke pahlu mein rahta hun aisa KHar hun main