wahi begam ki KHun-KHwari jo pahle thi so ab bhi hai

vahī begam kī ḳhūñ-ḳhvārī jo pahle thī so ab bhī hai

vahī derīna bīmārī jo pahle thī so ab bhī hai

vahī Tar-Tar vahī ḳhafgī vahī ġhamze vahī 'ishve

vahī tā'noñ kī bīmārī jo pahle thī so ab bhī hai

buḌhāpe meñ bhī un ko shauq haiñ 'ahd-e-javānī ke

lipstick kī ḳharīdārī jo pahle thī so ab bhī hai

vahī hai rūThnā un kā vahī maike kī hī dhamkī

vahī zillat vahī ḳhvārī jo pahle thī so ab bhī hai

kabhī hai saas kā ronā kabhī nandoñ se hai jhagḌā

zabāñ hai us kī do-dhārī jo pahle thī so ab bhī hai

faqat apne hī maike kī kiyā kartī haiñ tā'rīfeñ

mirī ammāñ se bezārī jo pahle thī so ab bhī hai

adab kā doctor ban kar milā kyā ham ġharīboñ ko

ġharībī aur bekārī jo pahle thī so ab bhī hai

huī shādī hue bachche 'nazar' kā haal hai patlā

vahī ab bhī hai lāchārī jo pahle thī so ab bhī hai

wahi begam ki KHun-KHwari jo pahle thi so ab bhi hai

wahi derina bimari jo pahle thi so ab bhi hai

wahi Tar-Tar wahi KHafgi wahi ghamze wahi 'ishwe

wahi ta'non ki bimari jo pahle thi so ab bhi hai

buDhape mein bhi un ko shauq hain 'ahd-e-jawani ke

lipstick ki KHaridari jo pahle thi so ab bhi hai

wahi hai ruThna un ka wahi maike ki hi dhamki

wahi zillat wahi KHwari jo pahle thi so ab bhi hai

kabhi hai sas ka rona kabhi nandon se hai jhagDa

zaban hai us ki do-dhaari jo pahle thi so ab bhi hai

faqat apne hi maike ki kiya karti hain ta'rifen

meri amman se bezari jo pahle thi so ab bhi hai

adab ka doctor ban kar mila kya hum gharibon ko

gharibi aur bekari jo pahle thi so ab bhi hai

hui shadi hue bachche 'nazar' ka haal hai patla

wahi ab bhi hai lachaari jo pahle thi so ab bhi hai