wahi dagh-e-lala ki baat hai ki ba-nam-e-husn udhar gai

vahī dāġh-e-lāla kī baat hai ki ba-nām-e-husn udhar ga.ī

koī kyā kahe ki kahāñ kahāñ tire ḳhāl-e-ruḳh kī ḳhabar ga.ī

koī haath dashna-e-jāñ-sitāñ koī haath marham-e-parniyāñ

ye to haath haath kī baat hai koī vaqt pā ke sañvar ga.ī

vahī ek suud o ziyāñ kā ġham jo mizāj-e-ishq se duur thā

vo tirī zabāñ pe bhī aa gayā to lagan hī jī kī bikhar ga.ī

kisī ek silsila-e-vafā kī matā.a zulf-e-dotā nahīñ

koī pech-o-tāb-e-havā mile ki vo zulf tā-ba-kamar ga.ī

ye shikāyat-e-dar-o-bām kyā ye rabāt-e-kohna kī raat kyā

koī be-charāġh shab-e-vafā tire shahr meñ bhī guzar ga.ī

isī zindagī ke hazār ufuq isī zindagī ke hazār ruḳh

isī ik ḳhayāl kī rau thī vo jo tirī jabīñ pe bikhar ga.ī

vo hazār shauq kī laġhzisheñ magar ek lazzat-e-nārasī

mirī āshnā-e-tarab nazar tire ruḳh pe aa ke Thahar ga.ī

kabhī ātish-e-ḳhas-o-ḳhār se bhī guloñ ko zauq-e-numū milā

kabhī shāḳh-e-gul se lahak uThī vo sināñ jo tā-ba-jigar ga.ī

vo zabān-e-sarmad-e-be-dalīl vo ḳharāsh-e-ḳhanjar-e-hukmarāñ

koī imtihān-e-dalīl kyā ki diloñ meñ baat utar ga.ī

vo ġharīb-e-shahr kahe bhī kyā jo tirī zabāñ se hai be-ḳhabar

magar ek rāh-e-suḳhan bhī hai ki ye zindagī hai jidhar ga.ī

wahi dagh-e-lala ki baat hai ki ba-nam-e-husn udhar gai

koi kya kahe ki kahan kahan tere KHal-e-ruKH ki KHabar gai

koi hath dashna-e-jaan-sitan koi hath marham-e-parniyan

ye to hath hath ki baat hai koi waqt pa ke sanwar gai

wahi ek sud o ziyan ka gham jo mizaj-e-ishq se dur tha

wo teri zaban pe bhi aa gaya to lagan hi ji ki bikhar gai

kisi ek silsila-e-wafa ki mataa zulf-e-dota nahin

koi pech-o-tab-e-hawa mile ki wo zulf ta-ba-kamar gai

ye shikayat-e-dar-o-baam kya ye rabaat-e-kohna ki raat kya

koi be-charagh shab-e-wafa tere shahr mein bhi guzar gai

isi zindagi ke hazar ufuq isi zindagi ke hazar ruKH

isi ek KHayal ki rau thi wo jo teri jabin pe bikhar gai

wo hazar shauq ki laghzishen magar ek lazzat-e-narasi

meri aashna-e-tarab nazar tere ruKH pe aa ke Thahar gai

kabhi aatish-e-KHas-o-KHar se bhi gulon ko zauq-e-numu mila

kabhi shaKH-e-gul se lahak uThi wo sinan jo ta-ba-jigar gai

wo zaban-e-sarmad-e-be-dalil wo KHarash-e-KHanjar-e-hukmaran

koi imtihan-e-dalil kya ki dilon mein baat utar gai

wo gharib-e-shahr kahe bhi kya jo teri zaban se hai be-KHabar

magar ek rah-e-suKHan bhi hai ki ye zindagi hai jidhar gai