wahi ek fareb hasrat ki tha baKHshish-e-nigaran

vahī ik fareb hasrat ki thā baḳhshish-e-nigārāñ

so qadam qadam pe khāyā ba tarīq-e-puḳhta-kārāñ

vo chale ḳhizāñ ke Dere ki hai āmad-e-bahārāñ

shab-e-ġham ke rah-nashīnoñ kaho ab salāh-e-yārāñ

mire āshiyāñ kā kyā hai mirā āsmāñ salāmat

haiñ mire chaman kī raunaq yahī barq-o-bād-o-bārāñ

na sahī pasand-e-hikmat ye shi.ār-e-ahl-e-dil hai

kabhī sar bhī de diyā hai ba-salāh-e-dost-dārāñ

rahe husn ban ke āḳhir jo ḳhayāl udhar se guzre

ye kidhar kī chāñdnī thī sar-e-ḳhāk-e-rah-e-guzārāñ

mire ek dil kī ḳhātir ye kashākash-e-havādis

tire ek ġham ke badle ye hujūm-e-ġham-gusārāñ

mirī vahshatoñ ne jis ko na banā ke raaz rakkhā

vahī raaz hai ki ab tak hai miyān-e-rāz-dārāñ

kisī manchale ne bhejā hai mai-e-suḳhan se bhar kar

ki ye sāġhar-e-dil-afzā hai ye nazr-e-dil-nigārāñ

wahi ek fareb hasrat ki tha baKHshish-e-nigaran

so qadam qadam pe khaya ba tariq-e-puKHta-karan

wo chale KHizan ke Dere ki hai aamad-e-bahaaran

shab-e-gham ke rah-nashinon kaho ab salah-e-yaran

mere aashiyan ka kya hai mera aasman salamat

hain mere chaman ki raunaq yahi barq-o-baad-o-baran

na sahi pasand-e-hikmat ye shiar-e-ahl-e-dil hai

kabhi sar bhi de diya hai ba-salah-e-dost-daran

rahe husn ban ke aaKHir jo KHayal udhar se guzre

ye kidhar ki chandni thi sar-e-KHak-e-rah-e-guzaran

mere ek dil ki KHatir ye kashakash-e-hawadis

tere ek gham ke badle ye hujum-e-gham-gusaran

meri wahshaton ne jis ko na bana ke raaz rakkha

wahi raaz hai ki ab tak hai miyan-e-raaz-daran

kisi manchale ne bheja hai mai-e-suKHan se bhar kar

ki ye saghar-e-dil-afza hai ye nazr-e-dil-nigaran