waise to insan KHuda ka KHas KHalifa banta hai

vaise to insān ḳhudā kā ḳhaas ḳhalīfa bantā hai

lekin jo hālāt haiñ is ke un par ronā bantā hai

ham bhī tere saath khaḌe haiñ sabz rutoñ ke manzar meñ

phuul aur kāñTe saath raheñ to phir bāġhīcha bantā hai

kitnī tahzībeñ miTtī haiñ phir bantī hai ik tahzīb

kitnī nasloñ kī mehnat se ek ravayya bantā hai

maiñ kahtā huuñ qarya qarya DhūñD ke miltā hai ik shaḳhs

maiñ kahtā huuñ dariyā dariyā mil kar qatra bantā hai

saaya kyā ham-zād bhī aise vaqt meñ saath nahīñ detā

chhoḌ ke jaane vaale terā chhoḌ ke jaanā bantā hai

har mauqa par piiTh ke pīchhe ḳhanjar ghoñpne vaalā shaḳhs

sāmne jab aa jaatā hai to kitnā achchhā bantā hai

felun felun karne se ash.ār nahīñ bante haiñ dost

dhāro dhaar lahū girtā hai misrā misrā bantā hai

waise to insan KHuda ka KHas KHalifa banta hai

lekin jo haalat hain is ke un par rona banta hai

hum bhi tere sath khaDe hain sabz ruton ke manzar mein

phul aur kanTe sath rahen to phir baghicha banta hai

kitni tahziben miTti hain phir banti hai ek tahzib

kitni naslon ki mehnat se ek rawayya banta hai

main kahta hun qarya qarya DhunD ke milta hai ek shaKHs

main kahta hun dariya dariya mil kar qatra banta hai

saya kya ham-zad bhi aise waqt mein sath nahin deta

chhoD ke jaane wale tera chhoD ke jaana banta hai

har mauqa par piTh ke pichhe KHanjar ghonpne wala shaKHs

samne jab aa jata hai to kitna achchha banta hai

felun felun karne se ashaar nahin bante hain dost

dhaaro dhaar lahu girta hai misra misra banta hai