waise tumhein to aata nazar sab durust hai

vaise tumheñ to aatā nazar sab durust hai

chehre haiñ kyuuñ udaas agar sab durust hai

jaale tane hue haiñ darīchoñ meñ shahr ke

kahtā hai shahr-e-yār magar sab durust hai

hal yuuñ huā hai tishnagi-e-teġh kā savāl

maqtal meñ ho kisī kā bhī sar sab durust hai

maqsad to tajraba hai davā kā shifā nahīñ

kuchh bhī marīz par ho asar sab durust hai

jannat tū apnī dekh udhar kuchh kamī na ho

dozaḳh kī fikr chhoḌ idhar sab durust hai

bā-iḳhtiyār jo bhī ho us kī yahī hai soch

hai is meñ jo bhī aib o hunar sab durust hai

sāñseñ atā haiñ jis kī vasā.el bhī us kī den

phir jaise zindagī ho basar sab durust hai

bas ye huā ki chhupte hī aḳhbār bik gayā

sachchī hai yā ki jhūTī ḳhabar sab durust hai

waise tumhein to aata nazar sab durust hai

chehre hain kyun udas agar sab durust hai

jale tane hue hain darichon mein shahr ke

kahta hai shahr-e-yar magar sab durust hai

hal yun hua hai tishnagi-e-tegh ka sawal

maqtal mein ho kisi ka bhi sar sab durust hai

maqsad to tajraba hai dawa ka shifa nahin

kuchh bhi mariz par ho asar sab durust hai

jannat tu apni dekh udhar kuchh kami na ho

dozaKH ki fikr chhoD idhar sab durust hai

ba-iKHtiyar jo bhi ho us ki yahi hai soch

hai is mein jo bhi aib o hunar sab durust hai

sansen ata hain jis ki wasael bhi us ki den

phir jaise zindagi ho basar sab durust hai

bas ye hua ki chhupte hi aKHbar bik gaya

sachchi hai ya ki jhuTi KHabar sab durust hai