waqt-e-shab gum hua saya to mujhe yaad aaya

vaqt-e-shab gum huā saaya to mujhe yaad aayā

ho gayā apnā parāyā to mujhe yaad aayā

merī barbādī meñ thā haath koī poshīda

us ne jab haath milāyā to mujhe yaad aayā

talḳhī-e-daurāñ nahīñ badlegī ye talḳhī-e-mai

jaam jab sāmne aayā to mujhe yaad aayā

ret hī ret nazar aatī thī tā-hadd-e-nazar

ab ke sailāb jo aayā to mujhe yaad aayā

TuuTe ghar meñ vo thakā haarā kabūtar sar-e-shām

ghoñsla DhūñDne aayā to mujhe yaad aayā

zindagī sirf kaḌī dhuup safar lambā hai

kahīñ saaya nazar aayā to mujhe yaad aayā

is añdhere meñ kahīñ hogā ujālā kuchh to

maiñ ne dil apnā jalāyā to mujhe yaad aayā

merā ehsās abhī murda nahīñ hai shāyad

us ne jab mujh ko rulāyā to mujhe yaad aayā

sirf matlab ke ġharaz ke haiñ yahāñ sab rishte

us ne ehsān jatāyā to mujhe yaad aayā

ek vīrānī hai sannāTā hai aur kuchh bhī nahīñ

shahr meñ apne jab aayā to mujhe yaad aayā

be-yaqīnī mire ehsās kā sarmāya hai

vo mire sāmne aayā to mujhe yaad aayā

zindagī ahd-e-guzishta kī purānī taqsīr

daur-e-hāzir ne satāyā to mujhe yaad aayā

be-sabātī hī haqīqat hai jahāñ meñ yaaro

dil kā bhī zaḳhm bhar aayā to mujhe yaad aayā

dil se kuchh us kā ta.alluq nahīñ rasman mujh ko

duur tak chhoḌne aayā to mujhe yaad aayā

kaT ga.ī umr bhaTakte hī bhaTakte 'hairat'

rāsta jab nazar aayā to mujhe yaad aayā

waqt-e-shab gum hua saya to mujhe yaad aaya

ho gaya apna paraya to mujhe yaad aaya

meri barbaadi mein tha hath koi poshida

us ne jab hath milaya to mujhe yaad aaya

talKHi-e-dauran nahin badlegi ye talKHi-e-mai

jam jab samne aaya to mujhe yaad aaya

ret hi ret nazar aati thi ta-hadd-e-nazar

ab ke sailab jo aaya to mujhe yaad aaya

TuTe ghar mein wo thaka haara kabutar sar-e-sham

ghonsla DhunDne aaya to mujhe yaad aaya

zindagi sirf kaDi dhup safar lamba hai

kahin saya nazar aaya to mujhe yaad aaya

is andhere mein kahin hoga ujala kuchh to

main ne dil apna jalaya to mujhe yaad aaya

mera ehsas abhi murda nahin hai shayad

us ne jab mujh ko rulaya to mujhe yaad aaya

sirf matlab ke gharaz ke hain yahan sab rishte

us ne ehsan jataya to mujhe yaad aaya

ek virani hai sannaTa hai aur kuchh bhi nahin

shahr mein apne jab aaya to mujhe yaad aaya

be-yaqini mere ehsas ka sarmaya hai

wo mere samne aaya to mujhe yaad aaya

zindagi ahd-e-guzishta ki purani taqsir

daur-e-hazir ne sataya to mujhe yaad aaya

be-sabaati hi haqiqat hai jahan mein yaro

dil ka bhi zaKHm bhar aaya to mujhe yaad aaya

dil se kuchh us ka talluq nahin rasman mujh ko

dur tak chhoDne aaya to mujhe yaad aaya

kaT gai umr bhaTakte hi bhaTakte 'hairat'

rasta jab nazar aaya to mujhe yaad aaya