waqt ke hathon hikayat-e-ana bhul gae

vaqt ke hāthoñ hikāyāt-e-anā bhuul ga.e

ham vafā bhuul ga.e aap jafā bhuul ga.e

kis ko samjhā.eñ ye samjhāne kī bāteñ kab haiñ

vasl kab yaad rahā hijr meñ kyā bhuul ga.e

kyā chaman chhoḌā palaT kar nahīñ dekhā us ko

rañg-e-gul bū-e-saman bād-e-sabā bhuul ga.e

bujh ga.ī sham-e-junūñ luT ga.ī bazm-e-yārāñ

ahl-e-dil sozish-e-jāñ hotī hai kyā bhuul ga.e

aisā vīrān huā ka.aba-e-hastī yārab

rah ga.e haath uThe harf-e-duā bhuul ga.e

husn sarshārī-e-andāz-o-adā se guzrā

aur sab ahl-e-vafā rasm-e-vafā bhuul ga.e

kam-ayārī ne ḳhudā-soz banāyā aisā

but to sab yaad rahe ek ḳhudā bhuul ga.e

kaun soche bhalā kyoñ dil nahīñ pāband-e-namāz

jab sar-e-shām azānoñ kī sadā bhuul ga.e

shahr-e-jānāñ meñ nahīñ pūchhne vaalā koī

kaun ho aa.e ho kyoñ tum yahāñ kyā bhuul ga.e

ḳhuub 'sarvar' tumheñ ummīd-e-karam yaad rahī

kyā sitam hai ki gunāhoñ kī sazā bhuul ga.e

waqt ke hathon hikayat-e-ana bhul gae

hum wafa bhul gae aap jafa bhul gae

kis ko samjhaen ye samjhane ki baaten kab hain

wasl kab yaad raha hijr mein kya bhul gae

kya chaman chhoDa palaT kar nahin dekha us ko

rang-e-gul bu-e-saman baad-e-saba bhul gae

bujh gai sham-e-junun luT gai bazm-e-yaran

ahl-e-dil sozish-e-jaan hoti hai kya bhul gae

aisa viran hua kaba-e-hasti yarab

rah gae hath uThe harf-e-dua bhul gae

husn sarshaari-e-andaz-o-ada se guzra

aur sab ahl-e-wafa rasm-e-wafa bhul gae

kam-ayari ne KHuda-soz banaya aisa

but to sab yaad rahe ek KHuda bhul gae

kaun soche bhala kyon dil nahin paband-e-namaz

jab sar-e-sham azanon ki sada bhul gae

shahr-e-jaanan mein nahin puchhne wala koi

kaun ho aae ho kyon tum yahan kya bhul gae

KHub 'sarwar' tumhein ummid-e-karam yaad rahi

kya sitam hai ki gunahon ki saza bhul gae