wo aashna-e-manzil-e-irfan hua nahin

vo āshnā-e-manzil-e-irfāñ huā nahīñ

jis ko tire karam kā sahārā milā nahīñ

dekhā bahut nigāh-e-talab ko milā nahīñ

tum se tum hī ho tum sā koī dūsrā nahīñ

jā.ūñ to uTh ke jā.ūñ kahāñ tere dar se maiñ

tere sivā kisī ko bhī dil māntā nahīñ

terā karam matā-e-do-ālam mire liye

terā karam rahe to do-ālam meñ kyā nahīñ

dast-e-talab baḌhe to mile phir karam kī bhiik

un kī atā ne ye bhī gavāra kiyā nahīñ

maiñ bhī faqīr-e-dar huuñ mujhe bhī navāz do

māyūs koī dar se tumhāre gayā nahīñ

takmīl bandagī na huī mujh se ai 'fanā'

jab tak dar-e-habīb pe sajda kiyā nahīñ

wo aashna-e-manzil-e-irfan hua nahin

jis ko tere karam ka sahaara mila nahin

dekha bahut nigah-e-talab ko mila nahin

tum se tum hi ho tum sa koi dusra nahin

jaun to uTh ke jaun kahan tere dar se main

tere siwa kisi ko bhi dil manta nahin

tera karam mata-e-do-alam mere liye

tera karam rahe to do-alam mein kya nahin

dast-e-talab baDhe to mile phir karam ki bhik

un ki ata ne ye bhi gawara kiya nahin

main bhi faqir-e-dar hun mujhe bhi nawaz do

mayus koi dar se tumhaare gaya nahin

takmil bandagi na hui mujh se ai 'fana'

jab tak dar-e-habib pe sajda kiya nahin