wo ahd ahd hi kya hai jise nibhao bhi

vo ahd ahd hī kyā hai jise nibhāo bhī

hamāre va.ada-e-ulfat ko bhuul jaao bhī

bhalā kahāñ ke ham aise gumān vaale haiñ

hazār baar ham aa.eñ hameñ bulāo bhī

bigaḌ chalā hai bahut rasm-e-ḳhud-kushī kā chalan

Darāne vaalo kisī roz kar dikhāo bhī

nahīñ ki arz-e-tamannā pe maan hī jaao

hameñ is ahd-e-tamannā meñ āzmāo bhī

fuġhāñ ki qissa-e-dil sun ke log kahte haiñ

ye kaun sī na.ī uftād hai haTāo bhī

tumhārī niiñd meñ Duubī huī nazar kī qasam

hameñ ye zid hai ki jaago bhī aur jagāo bhī

wo ahd ahd hi kya hai jise nibhao bhi

hamare wada-e-ulfat ko bhul jao bhi

bhala kahan ke hum aise guman wale hain

hazar bar hum aaen hamein bulao bhi

bigaD chala hai bahut rasm-e-KHud-kushi ka chalan

Darane walo kisi roz kar dikhao bhi

nahin ki arz-e-tamanna pe man hi jao

hamein is ahd-e-tamanna mein aazmao bhi

fughan ki qissa-e-dil sun ke log kahte hain

ye kaun si nai uftad hai haTao bhi

tumhaari nind mein Dubi hui nazar ki qasam

hamein ye zid hai ki jago bhi aur jagao bhi