wo dhup wo galiyan wahi uljhan nazar aae

vo dhuup vo galiyāñ vahī uljhan nazar aa.e

is shahr se us shahr kā āñgan nazar aa.e

is ġham ke ujāle meñ jo ik shaḳhs khaḌā hai

vo duur se mujh ko mirā sājan nazar aa.e

ik hijr ke sho.ale meñ ka.ī baar jale ham

is aas meñ shāyad ki nayā-pan nazar aa.e

ye raat ga.e kaun hai is peḌ ke nīche

ik diip sā har shāḳh pe raushan nazar aa.e

vo baat kaho jis ko tarastī rahe duniyā

vo harf likho jis meñ koī fan nazar aa.e

wo dhup wo galiyan wahi uljhan nazar aae

is shahr se us shahr ka aangan nazar aae

is gham ke ujale mein jo ek shaKHs khaDa hai

wo dur se mujh ko mera sajan nazar aae

ek hijr ke shoale mein kai bar jale hum

is aas mein shayad ki naya-pan nazar aae

ye raat gae kaun hai is peD ke niche

ek dip sa har shaKH pe raushan nazar aae

wo baat kaho jis ko tarasti rahe duniya

wo harf likho jis mein koi fan nazar aae