wo dilawar jo siyah shab ke shikari nikle

vo dilāvar jo siyah shab ke shikārī nikle

vo bhī chaḌhte hue sūraj ke pujārī nikle

sab ke hoñToñ pe mire ba.ad haiñ bāteñ merī

mere dushman mire lafzoñ ke bhikārī nikle

ik janāza uThā maqtal meñ ajab shaan ke saath

jaise saj kar kisī fāteh kī savārī nikle

ham ko har daur kī gardish ne salāmī dī hai

ham vo patthar haiñ jo har daur meñ bhārī nikle

aks koī ho ḳhad-o-ḳhāl tumhāre dekhūñ

bazm koī ho magar baat tumhārī nikle

apne dushman se maiñ be-vaj.h ḳhafā thā 'mohsin'

mere qātil to mire apne havārī nikle

wo dilawar jo siyah shab ke shikari nikle

wo bhi chaDhte hue suraj ke pujari nikle

sab ke honTon pe mere baad hain baaten meri

mere dushman mere lafzon ke bhikari nikle

ek janaza uTha maqtal mein ajab shan ke sath

jaise saj kar kisi fateh ki sawari nikle

hum ko har daur ki gardish ne salami di hai

hum wo patthar hain jo har daur mein bhaari nikle

aks koi ho KHad-o-KHal tumhaare dekhun

bazm koi ho magar baat tumhaari nikle

apne dushman se main be-wajh KHafa tha 'mohsin'

mere qatil to mere apne hawari nikle