wo dilbari ka uski jo kuchh haal hai so hai

vo dilbarī kā us kī jo kuchh haal hai so hai

aur apnī dil-dahī kā jo ahvāl hai so hai

mat pūchh us kī zulf kī uljheḌe kā bayān

ye merī jaan ke liye janjāl hai so hai

nekī badī kā koī kisī ke nahīñ sharīk

jo apnā apnā nāma-e-a.amāl hai so hai

pis jaa.e koī ho yā ki pāmāl us ko kyā

is gardish-e-falak kī jo kuchh chaal hai so hai

ve hī alam meñ aahoñ ke vaisī hī fauj-e-ashk

ab tak ġham-o-alam kā jo iqbāl hai so hai

aisā to vo nahīñ jo mirā chārasāz ho

phir fā.eda kahe se jo kuchh haal hai so hai

shikva mujhe to sozan-e-mizhgāñ se kuchh nahīñ

dil ḳhaar ḳhaar aah se ġhirbāl hai so hai

naqsh-e-qadam kī tarah 'hasan' us kī raah meñ

apnā ye dil sadā se jo pāmāl hai so hai

wo dilbari ka us ki jo kuchh haal hai so hai

aur apni dil-dahi ka jo ahwal hai so hai

mat puchh us ki zulf ki uljheDe ka bayan

ye meri jaan ke liye janjal hai so hai

neki badi ka koi kisi ke nahin sharik

jo apna apna nama-e-amal hai so hai

pis jae koi ho ya ki pamal us ko kya

is gardish-e-falak ki jo kuchh chaal hai so hai

we hi alam mein aahon ke waisi hi fauj-e-ashk

ab tak gham-o-alam ka jo iqbaal hai so hai

aisa to wo nahin jo mera chaarasaz ho

phir faeda kahe se jo kuchh haal hai so hai

shikwa mujhe to sozan-e-mizhgan se kuchh nahin

dil KHar KHar aah se ghirbaal hai so hai

naqsh-e-qadam ki tarah 'hasan' us ki rah mein

apna ye dil sada se jo pamal hai so hai