wo dur KHwabon ke sahilon mein azab kis ke hain KHwab kis ke

vo duur ḳhvāboñ ke sāhiloñ meñ azaab kis ke haiñ ḳhvāb kis ke

ye kaun jaane ki ab rutoñ meñ azaab kis ke haiñ ḳhvāb kis ke

ye kaun jaane ki kis kā chehra ġhubār lamhoñ meñ ḳhaak hogā

ye kaun jaane ki ab dinoñ meñ azaab kis ke haiñ ḳhvāb kis ke

ye zard chehre kī saarī zardī ye bāñjh āñkhoñ kā ratjagā-pan

ye pūchhte haiñ ki ā.inoñ meñ azaab kis ke haiñ ḳhvāb kis ke

jabīñ pe ubhrī huī shikan meñ ye kis kī yādoñ kā aks-e-ġham hai

ye vaqt ke bahte dā.eroñ meñ azaab kis ke haiñ ḳhvāb kis ke

ye dhuup chhāñv ye ḳhaar kaliyāñ ye sāhiloñ kī havā kī ḳhushbū

ye isti.āroñ alāmatoñ meñ azaab kis ke haiñ ḳhvāb kis ke

ye kaun jaane ki karb kyā hai udaas lahje meñ dard kyā hai

ye kaun jaane ki ab diloñ meñ azaab kis ke haiñ ḳhvāb kis ke

tamām ḳhilqat dukhoñ kī taḳhtī gale meñ le kar khaḌī huī hai

jo roz hote haiñ sānehoñ meñ azaab kis ke haiñ ḳhvāb kis ke

ye jurm-e-gandum hamārā virsa sahī magar ye hayāt 'dānish'

jo kāTte haiñ ham in dukhoñ meñ azaab kis ke haiñ ḳhvāb kis ke

wo dur KHwabon ke sahilon mein azab kis ke hain KHwab kis ke

ye kaun jaane ki ab ruton mein azab kis ke hain KHwab kis ke

ye kaun jaane ki kis ka chehra ghubar lamhon mein KHak hoga

ye kaun jaane ki ab dinon mein azab kis ke hain KHwab kis ke

ye zard chehre ki sari zardi ye banjh aankhon ka ratjaga-pan

ye puchhte hain ki aainon mein azab kis ke hain KHwab kis ke

jabin pe ubhri hui shikan mein ye kis ki yaadon ka aks-e-gham hai

ye waqt ke bahte daeron mein azab kis ke hain KHwab kis ke

ye dhup chhanw ye KHar kaliyan ye sahilon ki hawa ki KHushbu

ye istiaron alamaton mein azab kis ke hain KHwab kis ke

ye kaun jaane ki karb kya hai udas lahje mein dard kya hai

ye kaun jaane ki ab dilon mein azab kis ke hain KHwab kis ke

tamam KHilqat dukhon ki taKHti gale mein le kar khaDi hui hai

jo roz hote hain sanehon mein azab kis ke hain KHwab kis ke

ye jurm-e-gandum hamara wirsa sahi magar ye hayat 'danish'

jo kaTte hain hum in dukhon mein azab kis ke hain KHwab kis ke