wo itna sada hai zalim ki kuchh pata na lage

vo itnā saada hai zālim ki kuchh pata na lage

jafā kare bhī to aise ki be-vafā na lage

vo jis pe tark-e-vafā kā gumān tak bhī na thā

badal gayā hai kuchh aisā ki āshnā na lage

'ajīb baat hai ik shaḳhs ke na hone se

mirā hī ghar hai magar mujh ko qaid-ḳhāna lage

khaḌā ho vo bhī mire saath hī kaTahre meñ

magar kahāñ vo 'adālat ki munsifāna lage

mujhe jo rok rahe ho tum us kī puujā se

ye us se kyoñ nahīñ kahte ki devtā na lage

tirī shu'ā'-e-badan se nazar jhulastī hai

tire gale se koī kaise vālihāna lage

ye taptī ret ye ḳheme ye siskiyāñ 'be-dil'

mujhe to ye kisī mazlūm kā gharānā lage

wo itna sada hai zalim ki kuchh pata na lage

jafa kare bhi to aise ki be-wafa na lage

wo jis pe tark-e-wafa ka guman tak bhi na tha

badal gaya hai kuchh aisa ki aashna na lage

'ajib baat hai ek shaKHs ke na hone se

mera hi ghar hai magar mujh ko qaid-KHana lage

khaDa ho wo bhi mere sath hi kaTahre mein

magar kahan wo 'adalat ki munsifana lage

mujhe jo rok rahe ho tum us ki puja se

ye us se kyon nahin kahte ki dewta na lage

teri shu'a'-e-badan se nazar jhulasti hai

tere gale se koi kaise walihana lage

ye tapti ret ye KHeme ye siskiyan 'be-dil'

mujhe to ye kisi mazlum ka gharana lage