wo jab aap se apna parda karen

vo jab aap se apnā pardā kareñ

to band-e-qabā kis tarah vā kareñ

agar ham na un kī tamannā kareñ

to vo ham pe kyuuñ naaz bejā kareñ

use log kyuuñ mehr-e-tābāñ kaheñ

jise duur se bhī na dekhā kareñ

kiyā us ne qatl aur maiñ ne muaaf

abas ahl-e-shahr us kā charchā kareñ

phire qais āvāra ham vo nahīñ

ki ma.ashūq ko apnī rusvā kareñ

mire dard-e-dil kī hī pursish davā

agar mujh ko pūchheñ to achchhā kareñ

ḳhudā be-niyāz aur but sañg-dil

kaho kis se ham raah paidā kareñ

chalo phir kaheñ un se ham hāl-e-dil

yahī phir kaheñge ki ham kyā kareñ

jinheñ fasl-e-gul meñ na ho dastaras

ki sāmān-e-ishrat muhayyā kareñ

vo qumrī-o-bulbul ko mutrib banā.eñ

gul-o-sarva ko jām-o-mīnā kareñ

unheñ kyā ho 'nāzim' qayāmat kā Dar

jo har roz ik fitna barpā kareñ

wo jab aap se apna parda karen

to band-e-qaba kis tarah wa karen

agar hum na un ki tamanna karen

to wo hum pe kyun naz beja karen

use log kyun mehr-e-taban kahen

jise dur se bhi na dekha karen

kiya us ne qatl aur main ne muaf

abas ahl-e-shahr us ka charcha karen

phire qais aawara hum wo nahin

ki mashuq ko apni ruswa karen

mere dard-e-dil ki hi pursish dawa

agar mujh ko puchhen to achchha karen

KHuda be-niyaz aur but sang-dil

kaho kis se hum rah paida karen

chalo phir kahen un se hum haal-e-dil

yahi phir kahenge ki hum kya karen

jinhen fasl-e-gul mein na ho dastaras

ki saman-e-ishrat muhayya karen

wo qumri-o-bulbul ko mutrib banaen

gul-o-sarwa ko jam-o-mina karen

unhen kya ho 'nazim' qayamat ka Dar

jo har roz ek fitna barpa karen